مەن اۋىلداعى تازا قازاق مەكتەبىنىڭ تۇلەگىمىن. وقۋ ءبىتىرىپ ءبىرىنشى جۇمىسىما كىرگەندە ورىسشا ەكى اۋىز ءسوزدى دۇرىس ايتا الماۋشى ەدىم. ياعني ىشكى دۇنيەم، بولمىسىم تازا قازاقي.

سول قازاقي بولمىسىممەن ءومىر بويى مۇناي سالاسىندا قىزمەت ەتىپ كەلەم. ءجاي مەردىگەر كومپانيادا قاراپايىم جۇمىسشى دا، ەلدەگى ەڭ ءىرى مۇناي كومپانياسىندا ءبولىم باسشىسى دا بولدىم. قازىر جۇمىسىم شەتەلدە، باسقا ەلدىڭ ۇلتتىق كومپانياسىندا شاقىرىلعان مامانمىن.

ەگەر بىرەۋلەر ايتقانداي قازاق مەكتەبى ساپالى ءبىلىم بەرمەيتىن بولسا قازاق مەكتەبىن بىتىرگەن مەن قالاي ءجۇرمىن؟ ەشقانداي ارنايى مەكتەپتە ەمەس، ءتىپتى گيمنازيا دا ەمەس، ءجاي سىنىپتا وقىدىم. قازىر ءۇش تىلدە ەركىن سويلەيمىن، ال ەڭ باستىسى - ءوز انا تىلىمدە ەركىن جانە ءسۇيسىنىپ سويلەيمىن.

بۇرىن بالالارىن ورىسشاعا بەرىپ جاتىرعاندارعا رەنجيتىن ەدىم، پاتريوتتىق سەزىمدەرىن وياتۋعا تىرىسۋشى ەدىم. قازىر ماعان ءبارىبىر. وقىتا بەرسىن. بالالارى بولاشاقتا قازاقستاندا تۇراتىن بولسا تىلدەن قينالادى. سەبەبى انا ءتىلىمىز ۋاقىت وتە ءىس جۇزىندە مەملەكەتتىك تىلگە اينالادى. ونى بىلمەيتىندەر جۇمىسقا كىرە المايتىن بولادى، ال كىرە قالسا وسە المايدى. مەن ءۇشىن بۇل انىق نارسە.

استاناداعى ايقايدى كوردىم. مەكتەپ ديرەكتورى دا، قاتىسقان دەپۋتاتتار دا وتە جاقسى ايتتى. بىراق ولاردىڭ ورنىندا مەن بولسام انا ەكى ايەلدى بالارىڭدى قازاقشاعا بەرىڭدەر دەپ ۇگىتتەمەس ەدىم. قازاق ءتىلى ولاردىڭ بالارىنا مۇقتاج ەمەس، كەرىسىنشە ولار مۇقتاج بولادى. ورگە سۇيرەگەندە جۇرمەسە تاڭداۋ وزدەرىنىكى.

ارمان راحمەت

Abai.kz