پۋتين كەتپەي بىزگە دە بوستاندىق جوق! ۋكراينا بارلاۋ قىزمەتى ءپۋتيننىڭ سىرقات ەكەنىن ايتتى.

ۋكراينا بارلاۋ قىزمەتىنىڭ جەتەكشىسى گەنەرال كيريلل بۋدانوۆ رەسەي باسشىسى ۆلاديمير ءپۋتيننىڭ سىرقات ەكەنىن ايتتى. ونىڭ ايتۋىنشا، ءپۋتيننىڭ ساياساتىمەن كەلىسپەيتىن بيلىكتىڭ ەڭ جوعارعى ەشەلونىندا وتىرعاندار ونى ساياساتتان تىقسىرۋعا دايىندالىپ جاتىر.

بۇل جونىندە بۋدانوۆ بريتاندىق Sky News تەلەارناسىنا بەرگەن سۇحباتىندا ايتتى. ۋكراينا بارلاۋ باسقارماسى باسشىسىنىڭ ايتۋىنشا، پۋتين ونكولوگيالىق اۋرۋمەن اۋىرادى. ول ءپۋتيننىڭ دەنساۋلىعى جايلى تۇجىرىمىن نەگە سۇيەنىپ ايتقانىن ناقتىلامادى.

بۋدانوۆ ۋكرايناداعى سوعىس جىل سوڭىنا دەيىن جالعاسادى، ەڭ شەشۋشى كەزەڭ تامىز ايىندا بولادى دەپ بولجايدى. ۋكراينا بارلاۋ قىزمەتى جەتەكشىسىنىڭ ايتۋىنشا، ناتيجەسىندە ۋكراينا قازىر ايىرىلىپ قالعان اۋماقتاردى، ونىڭ ىشىندە دونباسس پەن قىرىمدى دا وزىنە قايتارادى.

The Times باسىلىمى سەنبى كۇنى ۆلاديمير ءپۋتيننىڭ دەنساۋلىعى جايلى ماتەريال جاريالادى. باسىلىم رەسەيلىك وليگارح پەن باتىس ينۆەستورى اراسىنداعى اۋديواڭگىمەگە سۇيەنەدى.

امەريكالىق New Lines تىلشىلەرىنىڭ قولىنا تۇسكەن اڭگىمەدە رەسەيلىك بيزنەسمەن ءپۋتيننىڭ قان وبىرىنا شالدىققانىن ايتادى.

رەسەيلىك وليگارحتىڭ سوزىنشە، ۋكراينانى شابۋىلداۋعا بۇيرىق بەرگەن رەسەي پرەزيدەنتى "اقىلىنان اداسقان", ول وسىلايشا رەسەي ەكونوميكاسىن كۇيرەتىپ جاتىر. وليگارحتىڭ اتى-ءجونى اتالمايدى.

وسىعان دەيىن رەسەيدەن كەتكەن ميللياردەر ولەگ تينكوۆ جۋرناليست يۋري دۋدقا بەرگەن سۇحباتىندا رەسەيلىك ميللياردەرلەردىڭ باسىم بولىگى ۋكرايناداعى سوعىسقا قارسى ەكەنىن ايتقان.

"پروەكت" باسىلىمى جۋىردا ۆلاديمير ءپۋتيننىڭ دەنساۋلىعى جايلى زەرتتەۋ جاريالاپ، ونىڭ ونكولوگيالىق اۋرۋداردى ەمدەيتىن حيرۋرگ دارىگەرلەرگە بىرنەشە رەت قارالعانىن جازعان. زەرتتەۋ جۇرگىزگەندەر ءپۋتيننىڭ بىلتىر قىركۇيەكتە اياق استى وقشاۋلانعانىن، ودان كەيىن ول الەم ليدەرلەرى يا ۇكىمەت مۇشەلەرىمەن كەزدەسكەندە وتە الىستا وتىراتىنىن اڭعارعان.

جۋىردا قولدانۋشىلار ءپۋتيننىڭ قورعانىس ءمينيسترى سەرگەي شويگۋمەن كەزدەسۋ كەزىندەگى "ەرەكشە قيمىلىنا" نازار اۋدارعان.

كرەمل ءپۋتيننىڭ دەنساۋلىعىنا بايلانىستى تۇسىنىكتەمە بەرمەيدى نەمەسە پرەزيدەنتتىڭ دەنساۋلىعى جاقسى دەۋمەن شەكتەلەدى. پۋتين جۇرت الدىنا سيرەك شىعادى، الايدا وسى اپتادا ماسكەۋدە 9 مامىردا وتكەن اسكەري پاراد جانە وزگە دە شارالارعا قاتىسقان.

ۆلاديمير پۋتين 69 جاستا. ونىڭ باستاماسىمەن قابىلدانعان كونستيتۋتسيا تۇزەتۋلەرىنە سايكەس قايتا سايلانسا، بيلىكتە 2036 جىلعا دەيىن قالا قالادى.

جازبا الەۋمەتتىك جەلىدەن الىندى

Abai.kz