ۋكراينانىڭ ماريۋپول قالاسىنداعى "ازوۆستال" زاۋىتى اۋماعىنان شىققان ۋكراين جاۋىنگەرلەرىن دونەتسك تۇبىندەگى ەلەنوۆكا اۋىلىنداعى بۇرىنعى تۇزەۋ كولونياسىنا جەتكىزدى. بۇل تۋرالى Reuters كۋاگەرلەرگە سىلتەمە جاساي وتىرىپ حابارلادى.

تۇزەۋ مەكەمەسىن رەسەيلىك اسكەريلەر مەن "دحر" جىكشىلتەرىنىڭ وكىلدەرى باقىلاۋدا ۇستاپ وتىر.

رەسەي قورعانىس مينيسترلىگىنىڭ مالىمەتىنشە، "ازوۆستالدان" بارلىعى 959 جاۋىنگەر شىعارىلعان، سولاردىڭ ىشىندەگى 51 جارالى دونەتسك وبلىسى نوۆوازوۆسك اۋرۋحاناسىنا جەتكىزىلگەن.

17 مامىردا كەشكە اگەنتتىك ماريۋپولدەگى "ازوۆستال" زاۋىتى اۋماعىنان ۋكراين جاۋىنگەرلەرى مىنگەن كەم دەگەندە سەگىز اۆتوبۋس شىققانىن حابارلاعان.

"ازوۆستالدا" بەكىنگەن ۋكراين جاۋىنگەرلەرى زاۋىت اۋماعىنان 16 مامىردا شىعا باستادى. ولاردى رەسەي باقىلاۋىنداعى ايماقتارعا الىپ كەتتى. "ازوۆ" پولكىندەگىلەر قولباسشىلىق بۇيرىعىن ورىنداپ جاتقانىن، ال ۋكراين باس شتابى ولاردى "تۇتقىن الماستىرۋ تارتىبىمەن" كەرى قايتاراتىنىن حابارلادى. رەسەيدە بۇنى ءوز ەركىمەن بەرىلۋ دەپ اتاعان. كرەمل دە، قورعانىس مينيسترلىگى دە تۇتقىن الماسۋ جونىندە ەشتەڭە حابارلامادى.

Abai.kz