قازاقستان ۇكىمەتىنىڭ ۆيتسە-پرەمەرى ەرالى توعجانوۆ كوروناۆيرۋسپەن اۋىرعاندار كۇرت كوبەيسە، ماسكا تاعۋ ءتارتىبى قايتا ورالۋى مۇمكىن ەكەنىن ايتتى.

"ازىرگە ۋشىعىپ تۇرعان جوق، بىراق اۋىرعاندار ءارى قاراي دا كوبەيە بەرسە، ماسكا ءتارتىبى قايتا قولعا الىنۋى مۇمكىن. قازىر تاۋلىگىنە 100 ادامعا دەيىن اۋىرىپ جاتىر", — دەدى توعجانوۆ.

ونىڭ سوزىنشە، كارانتين شارالارىن كۇشەيتۋ ماسەلەسى كوروناۆيرۋسپەن كۇرەس جونىندە ۆەدومستۆو ارالىق كوميسسياسىنىڭ وتىرىسىندا قارالادى، وندا تەك ماسكا ماسەلەسى ەمەس، وزگە دە شارالار تالقىلانادى.

كەيىنگى كۇندەرى قازاقستاندا كوروناۆيرۋس جۇقتىرعاندار كوبەيە باستاعان. 30 ماۋسىمنىڭ تاڭىنداعى رەسمي مالىمەتكە قاراعاندا، ءبىر تاۋلىكتە قازاقستاندا 137 ادامعا جۇققان. ونىڭ 77-ءسى الماتىدا، 26-سى نۇر-سۇلتاندا. قازاقستاننىڭ باس سانيتار دارىگەرى ايجان ەسماعامبەتوۆانىڭ سوزىنشە، نۇر-سۇلتان مەن الماتى كوروناۆيرۋس ەكپىنى بويىنشا "سارى" ايماققا جاقىنداپ كەلەدى.

29 ماۋسىمدا دەنساۋلىق ساقتاۋ مينيسترلىگى ءبىر تاۋلىك بۇرىن (28 ماۋسىمدا) قازاقستاندا 110 ادامنان كوروناۆيرۋس شىققانىن، مۇنىڭ 27 ماۋسىمداعى كورسەتكىشتەن ەكى ەسە كوپ ەكەنىن ايتقان. بيىل ناۋرىزدا سوڭعى رەت تاۋلىگىنە 100-دەن استام ادامعا كوروناۆيرۋس جۇققان ەدى.

بۇگىنگە دەيىن قازاقستاندا بارلىعى 1 306 608 ادام كوروناۆيرۋسپەن اۋىرعان. 30 ماۋسىمداعى مالىمەتكە قاراعاندا، قازاقستاندا كوروناۆيرۋسكە قارسى ۆاكتسيانىنىڭ العاشقى كومپونەنتىن 9 524 362 ادام العان، 9 307 360 ادام ەكىنشى رەت ۆاكتسينالانعان.

Abai.kz