ۇستىمىزدەگى جىلى 20-كوكەكتە قازاقستاننىڭ قورعانىس ءمينيسترى رۋسلان جاقسىلىقوۆ جۋرناليستەر سۇراعىنا قازاق تىلىندە جاۋاپ بەرۋدەن باس تارتقانى ەستەرىڭىزدە بولار. ۆەدومستۆو باسشىسى: «بىلەسىزدەر مە، قاراڭىزدار، ءبىزدىڭ تۇڭعىش پرەزيدەنت، ەلباسى بىلاي دەدى: «100 قازاق تۇرعان ورتادا الدە ءبىر باسقا ءتىلدى ادام بولسا، ءبىز بىرەۋدىڭ كوڭىلىن قالدىرىپ الماۋ ءۇشىن ورىس تىلىنە اۋىسامىز»، – دەدى. جاڭا مينيستر ءسويتىپ ەسكى پرەزيدەنتتىڭ لاعىندىسىن ءالى كۇنگە ۇستانىم كورەدى ەكەن. ال اسكەري ادام ءۇشىن ەڭ باستى قۇجات ارينە، اسكەري جارعى. كەشە ارنايى وسى جارعىنى قاراپ شىققانىم بار. قاراپ شىقتىم دا اۋزىم اڭقايدى: قازاقستاننىڭ قارۋلى كۇشتەرىن باسقارىپ وتىرعان لاۋازىم يەسىنىڭ اسكەري ۋستاۆتان مۇلدە حابارسىز ەكەندىگى مەنى تاڭ قالدىردى.

قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ ىشكى قىزمەت جارعىسىنىڭ 14-بابىندا: «ءاربىر اسكەري قىزمەتشىنىڭ بورىشى – قازاقستان حالقى بىرلىگىنىڭ ماڭىزدى فاكتورى بولىپ تابىلاتىن مەملەكەتتىك ءتىلدى مەڭگەرۋ»، – دەپ اتاپ كورسەتىلىپتى.

تۇسىنبەيتىندەرگە ۋستاۆتىڭ ورىسشاسىن دا كەلتىرەيىن: «دولگ كاجدوگو ۆوەننوسلۋجاششەگو – وۆلادەنيە گوسۋدارستۆەننىم يازىكوم، ياۆليايۋششيمسيا ۆاجنەيشيم فاكتوروم كونسوليداتسي نارودا كازاحستانا».
وسىدان-اق ءمينيستردىڭ بويىندا مەملەكەتشىلدىك قاسيەت تاپشى ەكەندىگى بايقالىپ تۇر. ەگەر ول ءوز ۇلتىن، ءوز وتانىن شىن سۇيەتىن بولسا كورشى مەملەكەتتىڭ تىلىندە ەمەس ءوز مەملەكەتىنىڭ تىلىندە سويلەر ەدى.

سوندا پاتريوتتىق قاسيەتى كەمشىن، اسكەري ۋستاۆتى بىلمەيتىن ادام قالاي قازاقستان قارۋلى كۇشتەرىن باسقارىپ وتىر؟

مارات ءبايدىلداۇلى

Abai.kz