مىنا امەريكاندىق "حايمارس" سۇراپىل قارۋ ەكەن، ءبىر اقىر زامان قارۋى. رەسەي اسكەرىنىڭ قارۋ - جاراق قويمالارىن وت تيگەن جىڭعىلداي ورتەپ جاتىر.
ءبىرشاما باس شتابقا ءدال ءتيىپ ونداعى رەسەيلىك دارەجەلى وفيتسەرلەر ءتىرى ءمۇسىن بوپ ءۇيىتىلىپ كەتتى.

ون شاقتى كۇندە دالدەپ تۇرىپ 50 شاقتى اسكەري نىساندى جاي تۇسكەندەي قىلدى. قازىر باسقىنشىلار تۇتىنگە تۇنشىعىپ ابدىراپ اسىپ - ساسىپ قالدى دەسە بولادى.

كەز كەلگەن سوعىستىڭ تامىرى تىلداعى قارۋ جاراق قويماسى ەمەس پە، ونسىز سوعىس بولا ما.

سولاردى ۋكراين - امەريكاندىق جويقىن قارۋ دالدەپ تۇرىپ كەسىپ جاتىر.
ويناقتاعان ورەكەڭ وت باستى دەسە بولادى، ونىڭ تىل قويمالارىندا قارۋ جاراق قالماسا، ونىڭ ساربازدارىنا قىلىش - نايزا، روگاتكا، وقتاۋ، تاياق ۇستاپ، كەسەك - تاس، تەزەك - جاپا اتىسىپ سوعىسۋدان باسقا جول قالمايدى.
ۋكراين اسكەرى ءساۋىر - مامىر ايلارى قاتتى شىعىنعا ۇشىرادى، ۋكراين قىرىلىپ قالدى. ءتىپتى ارتيللەريالارى كۇيرەپ اتاتىن وقتارى قالماعان ەكەن (ارەستوۆيچتەن).

بۇل ەكى ايدا رەسەيلىك باسقىنشى ءبىراز ۇپايىن تۇگەندەپ الدى.
بىراق قازىر ۋكراين اسكەرى قايتا قاھارىنا مىنگەندەي.

ەكى اپتادان بەرى ورىس باسىپ العان حەرسوندى قورشاۋلاپ ءجۇر. ۇلكەن شايقاسقا دايىندىق جاساپ جاتىر. حەرسوننىڭ تاس - تالقانىن شىعارىپ بومبالاپ، اتقىلاپ ازات ەتەيىن دەسە... ول ءوز قالاسى، قانشاما تۇرعىندارى وپات بولادى، شىعىنى زور.

ۋكراين سودان ءبىراز ويلانىپ وتىرعان بولۋ كەرەك، سونى جان جاقتى كەسىپ ءپىشىپ وتىرعانعا ۇقسايدى.

پايىمداۋىمشا، وسى حەرسوندى ازات ەتۋ وپەراتسياسى ءساتتى شىقسا، ۋكرايندىقتار وسى نۇسقانى باسقا باسقىنشى باسقان قالالارىنا دا قولداناتىن بولادى.

كۇللى الەم يۋتۋبتەن ۋكراين ارنايى قىزمەتتەرى جاريالاپ جاتقان ورىس اسكەرىنىڭ ءوزارا نەمەسە تۋعان - تۋىستارىمەن سويلەسكەن اڭگىمەلەرىنە قانىق بوپ وتىر. ونداعى جاعداي ءماز ەمەس.

ورىس اسكەرىنىڭ ءجۇنى جىعىلعان، رۋھى تۇسكەن، قاساپحاناعا كىرگەن مالداي قىرىلىپ جاتىر. تەلەفون جەلىسىندەگى بوعاۋىز تۇنعان اڭگىمەلەر سونى حاباردار ەتەدى.

اسكەر ساپىندا سوعىسۋدان باس تارتقان "وتكازنيكتەر" ىرعىن كوپ. ۋكراين اسكەرى قولىن قاتتى باتىرىپ جىبەرسە ءپۋتيننىڭ اسكەرى قاشقالى تۇرعان كيىك سياقتى.

بىزدىكى ءجاي جورامال عوي ارينە، سونداي ءبىر جورامالىم - ۋكراين قارۋلى كۇشتەرى وسى قالىپتان تانباي ادەمىلەپ تۇرىپ ەندى 2 — 3 اي قىسسا، رەسەيلىك اسكەردىڭ ءبىرشاماسى تىم - تىراقاي قاشىپ، ءبىرازى قول كوتەرىپ بەرىلىپ يۋ - قيۋ بولىپ بەرەكەسى كەتەتىن سياقتى.
ءىستىڭ جوباسى سوعان بارا جاتىر.

پۋتين رەسەيدە جاپپاي موبيليزاتسيا جاريالاۋعا دايىندالىپ جاتىر دەگەن ءسوز شىعىپ جاتىر.

جاپپاي موبيليزاتسيا دەگەنىمىز - وق ءدارىنىڭ ءيىسىن سەزبەگەن بەيبىت ومىردەگى ەركەك كىندىكتىنىڭ اسكەر قاتارىنا تۇرۋى دەگەن ءسوز.
جانە ولاردى كەرەك جاراقپەن جابدىقتاۋعا جۇزدەگەن زاۋىت - فابريكا جۇمىس ىستەۋى كەرەك. وعان قىرۋار قاراجات كەرەك، وقىتىپ توقىتۋعا ءبىراز ۋاقىت دەگەندەي..

وسى جەردە تاعى دا ۋكرايناداعى سوعىس شەبىندەگى ورىستىڭ كاسىبي اسكەرى اناداي بوپ شاشىلىپ جاتسا، موبيليزاتسيادان كەلگەن "جاس يىستەن" قانداي پايدا بولادى ەكەن دەگەن سۇراق تا تۋىندايدى.

ودان ارىسى، ورىس اسكەرىنە جاڭا تولقىن كەلگەن ۋاقىتتا ۋكرايناعا "لەند ءليزدىڭ" بۇكىل قارۋى جەتەدى. ول كەزدە قازىرگى 10 "حايمەرس" 100 "حايمەرس"كە كوبەيۋى مۇمكىن.

ياعني، ول كەزدە ۋكراين اسكەرى قاندىقول قاساپشىعا، مۇشەلەپ تۋراۋشىعا اينالادى. بۇرىن ءبىر كەسەك ەت تۋراسا، ەندى بەس كەسەك تۋرار. قارقىن العان ۋكراين ءۇشىن رەسەي موبيليزاتسيانىڭ ماعىناسى سونداي بولار.

ءسوزدىڭ قىسقاسى، ۋكراين قارۋلى كۇشتەرى قازىر قاھارىنا ءمىنىپ شابۋىلعا شىققالى وتىر. پەرەموگانىڭ ءيىسى شىعىپ جاتىر.

ولجاس ءابىل

Abai.kz