قازىر ەكس-پرەزيدەنت نۇرسۇلتان نازارباەۆقا ارنالعان ەسكەرتكىش "رۋح وردو" مادەني ورتالىعىندا جوق، ۆيدەولار مەن فوتولارعا قاراعاندا ونى ءبىر جىل بۇرىن الىپ تاستاعان سياقتى دەپ سايت دالەل رەتىندە بىرنەشە ۆيدەو مەن سۋرەتتى كورسەتەدى.
"نۇرسۇلتان نازارباەۆ ەسكەرتكىشى ىستىقكولدەگى "رۋح وردودان" الىنىپ تاستالدى. ەسكەرتكىش كولگە جاقىن – ارىقتاردىڭ وڭ جاعىندا ورنالاسقان بولاتىن. ول 2005 جىلى [نازارباەۆقا] 65 جىل تولۋىنا وراي تۇرعىزىلعان. "رۋح-وردونىڭ" جاڭا سۋرەتتەرىندە ەسكەرتكىش كورىنبەيدى. ەسكەرتكىشتى ءبىر جىلدان استام ۋاقىت بۇرىن الىپ تاستاعان سياقتى، سەبەبى ول جاقتا بىلتىر دەمالعانداردىڭ ۆيدەوسىندا ەسكەرتكىش جوق" دەپ جازدى سايت بەيسەنبى كۇنى.
قىرعىزستان پرەزيدەنت اكىمشىلىگى اقپاراتقا تۇسىنىكتەمە بەرمەگەن. وسى اپتادا ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋى وسى ىستىقكول جاعالاۋىنداعى شولپان-اتا قالاسىندا وتكەن. ءبىر كۇن بۇرىن وسى قالادا قازاق جازۋشىسى مۇحتار اۋەزوۆتىڭ ءۇي-مۇراجايى الدىندا ونىڭ بيۋستى اشىلدى.
ىستىقكولگە نازارباەۆ ەسكەرتكىشى 2005 جىلى ورناتىلعان. سول ۋاقىتتا قىرعىزستان بيلىگى نازارباەۆقا ورناتىلعان ەسكەرتكىشتىڭ، قىرعىزداردىڭ قازاقتارعا دەگەن ماحابباتىنىڭ كورىنىسى بولىپ تابىلاتىندىعىن مالىمدەگەن.
بەلسەندىلەر مەن ساراپشىلار نازارباەۆ تۇسىندا قازاقستاندا جەكە باسقا تابىنۋ بەلەڭ الدى دەپ سانايدى. ول پرەزيدەنت بولىپ تۇرعان تۇستا ەلدە وعان ەسكەرتكىشتەر ورناتىلىپ، اۋەجاي، ءىرى قالالاردىڭ ورتالىق كوشەلەرى، ۋنيۆەرسيتەت پەن مەكتەپتەر جەلىسى نازارباەۆتىڭ اتىمەن اتالدى. بۇعان قوسا، قازاقستاننىڭ بىرنەشە قالاسىندا ەكس-پرەزيدەنت اتىنداعى ساياباق، سپورت كەشەنى جانە مۋزەيلەر بار.
قاڭتار وقيعاسىنان سوڭ نازارباەۆتىڭ بيلىككە ىقپالى السىرەگەن. قاڭتار قىرعىنى كەزىندە تالدىقورعاندا ونىڭ ەسكەرتكىشى قۇلاتىلدى. نۇر-سۇلتان قالاسىن استانا دەپ قايتا اتاۋ تۋرالى پەتيتسيا جازىلدى. نازارباەۆ پەن ونىڭ وتباسى بۇرىنعى قۇدىرەتىنەن بىرتىندەپ ايىرىلا باستادى، تۋعان-تۋىسى لاۋازىمدى قىزمەتتەرىنەن ءتۇستى، كەيبىرى تۇتقىندالدى.
نازارباەۆ بيلىك قۇرعان 29 جىلدا ونىڭ قىزدارى مەن اينالاسىنداعى جاقىندارى ەلدەگى ەڭ باي ادامعا اينالدى. ونىڭ قىزدارى مەن كۇيەۋبالالارى، جاقىندارىنىڭ شەتەلدەگى ۇيلەرى مەن وفشورداعى ەسەپشوتتارى بارى انىقتالعان.
Abai.kz
