الماتى قالاسىنداعى جاعدايى تومەن وتباسىنان شىققان 19 مىڭ وقۋشىعا  اكىمدىك مەكتەپ فورماسى مەن وقۋعا قاجەتتى كەرەك-جاراقتارىن ساتىپ الۋعا كومەكتەسەدى. وعان جەرگىلىكتى بيۋدجەتتەن 800 ملن تەڭگە بولىنەدى. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسى ءبىلىم باسقارماسىنىڭ باسشىسى ءلاززات جىلقىباەۆا مالىمدەدى.

بيىل اكتسيا 30 قىركۇيەككە دەيىن جالعاسادى جانە "مەكتەپكە جول - شەكاراسىز جاقسىلىق" ۇرانىمەن وتەدى. ول از قامتىلعان جانە كوپ بالالى وتباسىلاردان شىققان وقۋشىلارعا، جەتىم بالالارعا، سونداي-اق اتا-اناسىنىڭ قامقورلىعىنسىز قالعان بالالارعا وقۋ جىلىنىڭ باستالۋىنا دايىندىق كەزىندە ماتەريالدىق قولداۋ كورسەتۋگە جانە الەۋمەتتىك سەبەپتەر بويىنشا بالالاردىڭ مەكتەپكە كەلمەۋىنىڭ الدىن الۋعا باعىتتالعان.

"قازىردىڭ وزىندە مەكتەپتەردە وقۋشىلارعا وقۋ جىلىنا دايىندىققا كومەك كورسەتۋ بويىنشا جۇمىستار جۇرگىزىلۋدە. كومەككە مۇقتاج بالالاردىڭ دەرەكتەر بازاسى قۇرىلدى. ازاماتتاردىڭ وتىنىشتەرىنە جەدەل ارەكەت ەتۋ ءۇشىن جەدەل جەلىلەر، سەنىم تەلەفوندارىنىڭ جۇمىسى ۇيىمداستىرىلدى", - دەپ حابارلادى باسقارما باسشىسى.

بۇل شارا ەلىمىزدە 2008 جىلدان باستاپ  1 تامىز – 30 قىركۇيەك ارالىعىندا وتكىزىلىپ كەلەدى. ءىس-شاراعا قاتىساتىن بالالاردى ىرىكتەۋ ءۇشىن، الدىمەن ءاربىر ەلدى مەكەندە، قالا ماڭىنداعى ساياجايلاردا، بولىمدەردە، فەرمالاردا «تاۋەكەل توبىنداعى» (قادا­عالاۋسىز جانە پاناسىز بالالار، الەۋمەتتىك جاعدايى تومەن وتباسىلاردان شىققان بالالار جانە ميگرانتتار، قايىرشى بالالار، دالادا جۇمىس ىستەيتىن بالالار جانە ت.ب.) بالالاردى انىقتاۋ ءۇشىن رەيد جۇرگىزىلەدى.

سودان كەيىن رەيدتەردىڭ قورى­تىندىسى بويىنشا «تاۋەكەل توبىنداعى» وتباسىلاردان شىققان جانە الەۋمەتتىك كومەك­كە مۇقتاج بالا­لاردىڭ پەرسو­نالدى تىزىمدەرى جاسالىپ، ءبىلىم بەرۋ ورگاندارىنا جانە دە­مەۋشىلەرگە بەرىلەدى.

اكتسيا كەزىندە ءبىلىم بەرۋ مەكەمەلەرى مەن ۇيىم­دارىن­دا سەنىم تەلەفوندارى مەن قو­عام­دىق قابىلداۋلاردىڭ ءۇزىلىسسىز جۇمىسى ۇيىم­داس­تىرىلادى. ءىرى ساۋدا ورتا­لىق­تارىندا گۋما­نيتارلىق كومەك پۋنكتتەرى ورناتىلادى. اكتسيانى ۇيىمداستىرۋشالار قاتارىنا:

1) قر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى;

2) وبلىستاردىڭ، نۇرسۇلتان، الماتى، شىمكەنت قالالارىنىڭ اكىمدىكتەرى;

3) ءبىلىم باسقارمالارى;

4) بالا قۇقىقتارى جونىندەگى وڭىرلىك ۋاكىلدەر;

5) ورتا ءبىلىم بەرۋ ساپاسىن قامتاماسىز ەتۋ سالاسىنداعى دەپارتامەنتتەر;

6) كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى اۋماقتىق كوميسسيالاردىڭ حاتشىلارى، باسقا دا مۇددەلى تاراپتار كىرەدى.

قازاقستان رەسپۋبليكاسىنىڭ ءاربىر ازاماتى حالىقتىڭ الەۋمەتتىك وسال توپتارىنان شىققان بالالاردى مەكتەپكە دايىنداۋدا اتاۋلى كومەك كورسەتۋدە ازاماتتىق بەلسەندىلىك تانىتا الادى، سوندىقتان قايىرىمدىلىق كومەك كورسەتۋگە دەمەۋشىلەردى، مەتسەناتتاردى، مەملەكەتتىك قۇرىلىمداردى تارتۋ بويىنشا جۇمىستار جۇرگىزىلۋدە.

بالالارعا مەكتەپكە دايىندالۋعا كومەك كورسەتۋگە تىلەك بىلدىرۋشىلەر تۇرعىلىقتى جەرى بويىنشا اۋداندىق ءبىلىم بولىمدەرىنە نەمەسە تىكەلەي ءبىلىم بەرۋ ۇيىمىنا جۇگىنە الادى.

جەدەل جەلى بايلانىستارى حابارلاندىرۋدا الماتى قالاسى ءبىلىم باسقارماسىنىڭ سايتىندا كورسەتىلگەن.

الاتاۋ اۋدانى بويىنشا: 87006131198

المالى اۋدانى بويىنشا: 87470448553

اۋەزوۆ اۋدانى بويىنشا: 87025395397

بوستاندىق اۋدانى بويىنشا: 87772806650

جەتىسۋ اۋدانى بويىنشا: 87472940554

مەدەۋ اۋدانى بويىنشا: 87759194000

ناۋرىزباي اۋدانى بويىنشا: 87089359498

تۇركسىب اۋدانى بويىنشا: 87479013814

ءسوز سوڭىندا ل.جىلقىباەۆا جۋرناليستەردىڭ سۇراقتارىنا جاۋاپ بەرە وتىرىپ، قازىرگى ۋاقىتتا 1 قىركۇيەكتەن باستاپ مەملەكەتتىك مەكتەپتەردىڭ 1-4 سىنىپتارىنىڭ بارلىق وقۋشىلارىن تەگىن تاماقتاندىرۋدى ۇيىمداستىرۋ بويىنشا دايىندىق جۇرگىزىلىپ جاتقانىن حابارلادى.

سونىمەن قاتار، مەملەكەتتىك مەكتەپتەردىڭ وقۋشىلارى قايتارىمدى نەگىزدە 100% تەگىن وقۋلىقتارمەن قامتاماسىز ەتىلەتىنىن، ال 2-سىنىپ وقۋشىلارى جاڭا وقۋلىقتار الاتىنىن ناقتىلادى.

Abai.kz