شىمكەنت بۇكىل قازاقستاندى العا سۇيرەدى. بۇل تەك قانا الماتى مەن اتىراۋعا يەك ارتىپ وتىرعان ەلىمىز ءۇشىن كەرەمەت جاڭالىق بولدى.

ۇلتتىق ەكونوميكا مينيسترلىگى مالىمەتى بويىنشا، وسى جىلدىڭ جەتى ايىندا قازاقستان ەكونوميكاسى 3,3%-عا ءوستى. نەگىزى، دۇنيەجۇزىلىك بانك جارتى جىلدا قازاق ەكونوميكاسى شامامەن 2,2 پايىزعا وسەدى دەپ بولجاعان ەدى. مەن مۇناي باعاسىنىڭ ينديكاتورلىق مەجەدەن جوعارى بولعانىن ەسەپكە الىپ، 2,9% بولار دەپ ويلاعان ەدىم.

وسى ءوسىمدى قازاق ەلى ءۇشىن شىمكەنت قالاسى بەرگەنى كۇتپەگەن جاڭالىق بولدى. بۇعان دەيىن شىمكەنت ەشقاشان بارلىق كورسەتكىش بويىنشا وڭ ديناميكا قالىپتاستىرماعان. 2022 جىل وڭتۇستىك مەگاپوليس ءۇشىن وتە جايلى بولىپ وتىر.

شىمكەنت نەنىڭ ەسەبىنەن ءوستى؟

قالاداعى ونەركاسىپ كولەمى 507,5 ميلليارد تەڭگەگە جەتكەن، بۇل ناقتى كولەم يندەكسىنىڭ 108,4 پايىز كورسەتكىشى. بىراق، ەڭ قاتتى وسكەنى - ينۆەستيتسيا بولىپ وتىر. ونىڭ كولەمى 219,1 ميلليارد تەڭگەنى قۇراپ، 28,6 پايىزعا ارتتى. سونىڭ ىشىندەگى جەكە ينۆەستيتسيا ۇلەسى 166,5 ميلليارد تەڭگەگە جەتتى.

شىمكەنت ەلگە كەلەتىن اراب ينۆەستيتسياسىن وزىنە تارتاتىن نەگىزگى ورىن بولاتىن سياقتى. ەگەر وسى بولجام ورىندالسا، بولاشاقتا ول دونورلار قاتارىنا قوسىلادى دەپ كۇتۋىمىز ءتيىس. ەگەر شىمكەنتتىڭ ورتاق قازاننان العانىنان بەرەرى كوپ بولسا، ەلدىڭ قارجىلىق جۇكتەمەسى ءبىرشاما جەڭىلدەيدى. جالپى، تاراز نەمەسە قوستانايعا قاراعاندا شىمكەنتتى اسىراۋ وتە قيىن. ماسەلە ونداعى ادام سانىنىڭ كوپتىگىنە كەلىپ تىرەلىپ وتىر.

قازاقستان 2021-2022 جىلى كوروناۆيرۋس اكەلگەن (2020 جىل) رەتسەسسيادان (توقىراۋدان) تولىق شىقتى. جانە 2020 جىلى كارانتيننەن جوعالتقانىمىزدى تولىق قايتارىپ، ۇستىنەن ەسە قوسىپ الدىق.

بيىل ساۋدا مەن قۇرىلىستا ۇلكەن ءوسىم بولدى (6,2% جانە 8,6%). جىلدىڭ اياعىنا دەيىن وسى سەكتورلاردىڭ تاعى وسەتىنىنە كۇمان جوق. بىراق مەن كوبىنە قىزمەت كورسەتۋ سالاسىنداعى ىسكەرلىك بەلسەندىلىك كورسەتكىشتەرىنە كوبىرەك نازار اۋدارار ەدىم. قازىر ونداعى ءوسىم 2,5%. ءوندىرىسى از، بىراق حالقى كوپ الماتى، شىمكەنت سىندى قالالار ءۇشىن قىزمەت كورسەتۋ سالاسى اسا ماڭىزدى.
مۇناي ەمەس، شىمكەنت ەسەبىنەن ءوسۋىمىز ءبىز ءۇشىن جاعىمدى جاڭالىق. بۇل كومىرسۋتەك كاپيتالىنان ادامي كاپيتالعا قاراي جىلجىعانىمىزدى كورسەتەدى. ادام - مۇنايعا قاراعاندا اناعۇرلىم باعالى. سول ءۇشىن، ءبىر-ءبىرىمىزدى باعالايىق.

ايبار ولجاەۆ

Abai.kz