ەكس-پرەزيدەنت نۇرسۇلتان نازارباەۆتىڭ ءىنىسى بولات نازارباەۆقا قاتىستى سوڭعى ايلاردا باق بەتتەرىندە اقپاراتتار جيىلەدى. ال بۇگىن بولات نازارباەۆ پەن ونىڭ بۇرىنعى ايەلىنىڭ ۇستىنەن قىلمىستىق ءىز قوزعالعانى بەلگىلى بولدى.

«ەكس-پرەزيدەنتتىڭ ءىنىسى بولات نازارباەۆ پەن ونىڭ بۇرىنعى ايەلى مايرا قۇرمانعاليەۆانىڭ ۇستىنەن قىلمىستىق ءىس قوزعالىپ، سوتقا دەيىنگى تەرگەۋ باستالدى. ولارعا «Karuan» جشس-عا قاتىستى رەيدەرلىك تارتىپ الۋ بويىنشا ايىپ تاعىلۋدا»، - دەپ جازادى قازتاگ.

وسىعان دەيىن نۇرشا كاكەنوۆ دەيتىن كاسىپكەر بولات نازارباەۆ پەن ونىڭ بۇرىنعى ايەلىنىڭ ۇستىنەن «رەيدەرلىك جاسادى» دەپ قۇقىق قورعاۋ ورگاندارىنا ارىزدانعانى ايتىلعان ەدى.

كاكەنوۆ «Karuan» جشس-نى قۇرۋشىلاردىڭ ءبىرى. ال اتالعان سەرىكتەستىك ماڭعىستاۋ وبلىسىندا مارگەنەتس وندىرۋمەن اينالىسادى. الايدا، كاسىپكەر كاكەنوۆتەن وسى كاسىبىن تارتىپ الىپ، جشس-داعى ۇلەسىنەن ايىرعان. كاسىپكەر تارتقان شىعىن سوماسى – 150 ملن دوللار دەپ ەسەپتەلگەن.

تەرگەۋ 17 ماۋسىمدا باستالعان. ىسپەن قازىر الماتى قالاسى ەكونوميكالىق تەرگەۋ دەپارتامەنتى اينالىسىپ جاتقانى بەلگىلى بولدى.

ايتپاقشى، بيىل شىلدە ايىندا مايرا قۇرمانعاليەۆانىڭ ۇستىنەن دە قىلمىستىق ءىس قوزعالعانى باق-تا جاريا بولعان ەدى. الماتى پوليتسياسى مايرا قۇرمانعاليەۆانىڭ ۇستىنەن وسىدان 11 جىل بۇرىن اشىلعان قىلمىستىق ءىستى قايتا قوزعاعانى ايتىلعان. ول كەزدە بولات نازارباەۆتىڭ بەيرەسمي تۇردە ەكىنشى ايەلى سانالاتىن قۇرمانعاليەۆاعا بوپسالاۋ، ادام ۇرلىعى، زاڭسىز قۇلدىققا الۋ ت.ب. ايىپتار تاعىلعان. الايدا كەيىن بۇل ءىس جابىلعان.

سوڭعى ۋاقىتتارى ەكس-پرەزيدەنتتىڭ ءىنىسى بولات نازارباەۆ تۋرالى باق ءجيى جازىپ ءجۇر. جاڭالىقتار لەنتاسىندا بولات نازارباەۆتىڭ ۇستىنەن قوزعالعان قىلمىستىق ىستەر، رەيدەرلىك ارەكەتتەر تۋرالى ايتىلۋدا. ال جۋىردا بولات نازارباەۆتىڭ قىزى اكەسى تۋرالى باق-قا سۇحبات بەرىپ، جاعدايى كۇردەلى ەكەنىن، ارباعا تاڭىلىپ، سويلەۋدەن قالعانىن حابارلاعان.

بولات نازارباەۆقا قاتىستى ەل پىكىرى دە ەكۇشتى. بىرەۋلەر بولات نازارباەۆتى اولماتى وبلىسىنىڭ قوجاسى دەپ ەسەپتەسە، ەندى بىرەۋلەرى ونى تۇرىكتىڭ سۇلتان سۇلەيمەنىنە تەڭەپ جاتادى.

Abai.kz