قازاقستاندا شەكارالاس اۋداندارداعى ديزەل وتىنىنا ارنالعان بولشەك ساۋدا باعاسىن وزگەرتتى. مۇنان بىلاي ديزەل وتىنى شەتەلدىكتەرگە قىمباتقا ساتىلادى. بولشەك ساۋدا باعاسىن بەلگىلەۋ تۋرالى ەنەرگەتيكا مينيسترلىگىنىڭ بۇيرىعى 22 تامىزدان باستاپ كۇشىنە ەنەدى.

مينيسترلىك بۇل شارا ديزەل وتىنىنىڭ تاپشىلىعىنا جول بەرمەۋ ءۇشىن جاسالىپ وتىرعانىن ايتادى.

"مىناداي ماركالى بەنزيننىڭ باعاسى بۇرىنعى دەڭگەيدە قالادى: اي-80 – 89 تەڭگە. قوستاناي جانە سولتۇستىك قازاقستان وبلىستارىندا اي-92 جانە اي-93 ماركالى بەنزيننىڭ باعاسى ليترىنە 187 تەڭگە، قازاقستاننىڭ باسقا وبلىستارىندا ليترىنە 182 تەڭگە، ديزەل وتىنىنىڭ باعاسى ليترىنە 450 تەڭگە بولادى،- دەيدى مينيسترلىك تاراتقان اقپاراتتا.

بۇل اقپاراتتا ديزەل وتىنىنا ليميت بەلگىلەنگەنى ايتىلعان. قازاقستاندا بەرىلگەن جۇرگىزۋشى كۋالىگىن كورسەتكەندەرگە ءليترىن 230-260 تەڭگەدەن ەسەپتەلىپ، كۇنىنە 100 ليتر بەرىلەدى. ال كولىگىنىڭ قازاقستاندا تىركەلگەنى تۋرالى كۋالىگىن كورسەتكەندەرگە 230-260 تەڭگەدەن ەسەپتەلىپ، 300 ليترگە دەيىن ساتىلادى.

"قالعان ساناتتاعىلارعا، سونداي-اق كورسەتىلگەن ليميتتەردەن جوعارى ديزەل وتىنى ليترىنە 450 تەڭگەدەن ساتىلادى،-دەيدى مينيسترلىك.

كەيبىر جەرىلىكتى باق حابارىنا قاراعاندا وتكەن اپتادا قازاقستاننىڭ شەكاراداعى وڭىرلەرىندەگى جانار ماي بەكەتتەرىندە ديزەل وتىنىن ساتۋعا شەكتەۋ قويىلعان. كەيبىر بەكەتتەر تالونمەن، ءبىر ادامعا 50 ليتردەن عانا ساتقان.

بۇل جاعدايعا تۇسىنىكتەمە بەرگەن ەنەرگەتيكا مينيسترلىگى "ديزەل وتىنىن شەتەلدىك جۇك كولىكتەرى قۇيىپ اكەتىپ جاتقانىن" ايتقان.

ەنەرگەتيكا مينيسترلىگىنىڭ بۇگىنگى مالىمەتىنە قاراعاندا، قازاقستانمەن شەكتەسەتىن ەۋرازيا ەكونوميكا وداعىنا مۇشە ەلدەردە ديزەل وتىنىنىڭ باعاسى قازاقستاننىڭ ىشكى نارىعىنداعى باعادان قىمبات: ارمەنيادا ديزەل وتىنىنىڭ ءليترى 758 تەڭگە، رەسەيدە 446 تەڭگە، قىرعىزستاندا 412 تەڭگە، بەلارۋستە 446 تەڭگەدەن ساتىلادى.

Abai.kz