قازاقستان حالقى اسسامبلەياسىنىڭ مۇشەلەرى قازاقستانداعى ۋكراينا ەلشىسى پەتر ۆرۋبلەۆسكيدىڭ قازاقستاندىق بلوگەرلەردىڭ بىرىنە بەرگەن سۇحباتىندا ايتقان سوزدەرىنە قاتىستى ۇندەۋ جاسادى. 

ۇندەۋ قازاقستان حالقى اسسامبلەياسىنىڭ رەسمي سايتىندا جاريالاندى. اسسامبلەيا مۇشەلەرى قازاقستاندىقتاردى دۇشپاندىق پەن زۇلىمدىقتى ناسيحاتتايتىن ارانداتۋلارعا ەرمەي، ەلدەگى بەيبىتشىلىك پەن حالىق بىرلىگىن ساقتاۋعا جانە نىعايتۋعا شاقىردى.

ء"بىز، قازاقستان حالقى اسسامبلەياسىنىڭ مۇشەلەرى، قازاقستان رەسپۋبليكاسىنداعى ۋكراينا ەلشىسى پەتر ۆرۋبلەۆسكي مىرزانىڭ قازاقستاندىق بلوگەرلەردىڭ بىرىنە بەرگەن سۇحباتىندا ايتقان سوزدەرىن قاتاڭ ايىپتايمىز جانە ونداي سارىنداعى مالىمدەلەرگە جول بەرۋگە بولمايدى دەپ سانايمىز. بەيبىتشىلىك پەن بىرلىك – ءبىزدىڭ مەملەكەتتىك ساياساتتىڭ جانە قوعامدىق بىرىگۋدىڭ باستى قاعيداسى. سوندىقتان مۇنداي پىكىردى كىم ايتسا دا ءبىزدىڭ قارسىلىعىمىزعا ۇشىرايدى", – دەلىنگەن اسسامبلەيا ۇندەۋىندە.

"ديپلوماتيا – وشپەندىلىك پەن ارازدىقتى قوزدىرۋ ءۇشىن ەمەس، بەيبىتشىلىك پەن ىنتىماقتاستىق يدەالدارىنا قىزمەت ەتۋى ءتيىس. قازاقستاننىڭ ءبىرتۇتاس كوپەتنوستى حالقى ءۇشىن دوستىق، ءوزارا كومەك جانە بەيبىتشىلىك قاعيدالارى مىزعىمايتىن ۇستانىم. ولار بىزگە تاۋەلسىزدىگىمىزدىڭ قالىپتاسۋىنىڭ ەڭ قيىن جىلدارىندا دا ەتنوسارالىق قاقتىعىستاردىڭ الدىن الىپ، ەلىمىز بەن حالقىمىزدىڭ تۇتاستىعىن ساقتاۋعا كومەكتەستى.

وشپەندىلىكتى قوزدىراتىن كەز-كەلگەن پىكىر، ەتنوستىق جەك كورۋشىلىك پەن ونىڭ قانداي بولماسىن كورىنىستەرىن ناسيحاتتاۋ – ءبىز ءۇشىن جات ۇعىم. بارلىق قازاقستاندىقتى دۇشپاندىق پەن زۇلىمدىقتى ناسيحاتتايتىن ارانداتۋلارعا ەرمەي، ۇرپاقتىڭ بۇگىنى مەن بولاشاعى ءۇشىن ەلدەگى بەيبىتشىلىك پەن حالىق بىرلىگىن ساقتاۋعا جانە نىعايتۋعا شاقىرامىز", – دەلىنگەن ۇندەۋدە.

Abai.kz