رەسەيدىڭ قاۋىپسىزدىك قىزمەتىنىڭ حاتشىسى نيكولاي پاترۋشەۆ تاجىكستاندا اقش-تىڭ قاتىسۋىمەن ءوتىپ جاتقان "ايماقتىق ىنتىماقتاستىق 2022" اسكەري جاتتىعۋى ايماققا قاۋىپ ءتوندىرۋى مۇمكىن دەپ مالىمدەدى.

10-20 تامىز ارالىعىندا دۋشانبەدە اقش اسكەرىنىڭ قاتىسۋىمەن اسكەري جاتتىعۋ وتكەن. وعان تاجىكستان، قازاقستان، قىرعىزستان، وزبەكستان، پاكىستان جانە موڭعوليا اسكەرلەرى قاتىسقان.

نيكولاي پاترۋشەۆ اقش-تىڭ ورتالىق ازياعا اسكەري جاتتىعۋ وتكىزۋىندە، "اسكەري قيمىلىنىڭ مۇمكىندىگىن يگەرۋ، قارۋدى ءدال كوزدەۋ ءۇشىن ءتسيفرلى كارتالارىنا وزگەرىستەر ەنگىزۋ ماقساتى جاتىر" دەپ مالىمدەدى.

پاترۋشەۆ بۇل مالىمدەمەسىن تاشكەنتتە وتكەن شىۇ-عا مۇشە ەلدەردىڭ قاۋىپسىزدىك قىزمەتى حاتشىلارىنىڭ كەزدەسۋىندە ايتتى. ونىڭ بۇل مالىمدەمەسىن 23 تامىزدا رەسەيلىك "ارگۋمەنتى ي فاكتى" گازەتى جاريالادى.

پاترۋشەۆ "ۆاشينگتون اۋعانستانمەن كورشى ەلدەرمەن انتيتەرروريستىك وپەراتسيا جۇرگىزۋ ماقساتىندا ۋاقىتشا ينفراقۇرىلىم جۇرگىزۋگە تالپىنىپ جاتىر" دەدى.

"شىۇ-عا مۇشە ەلدەر امەريكالىق باستامانىڭ ءبىزدىڭ قاۋىپسىزدىگىمىزگە قانداي قاتەر ءتوندىرىپ تۇرعانىن ويلانادى دەگەن ۇمىتتەمىن", - دەگەن پاترۋشەۆ.

قانداي "قاۋىپ ءتوندىرىپ تۇرعانىن" رف قاۋىپسىزدىك قىزمەتى حاتشىسى ايتپادى. رەسەي ۋكرايناعا سوعىس اشقاننان كەيىن، ماسكەۋ مەن ۆاشينگتون قاتىناسى بىردەن ناشارلاپ كەتتى. اقش ۋكرايناعا اسكەري كومەك كورسەتىپ كەلەدى.

تاجىكستاننىڭ قاۋىپسىزدىك قىزمەتىنىڭ حاتشىسى ناسرۋللو ماحمۋدزودا رەسەيلىك ارىپتەسىنىڭ مالىمدەمەسىنە پىكىرىن ءبىلدىردى.

"پاترۋشەۆ مىرزا رەسەيمەن ستراتەگيالىق ارىپتەستىك وزگەرىسسىز قالادى. تاجىكستان مەن رەسەيدىڭ ستراتەگيالىق قارىم-قاتىناسىنا ەشقانداي قاۋىپ ءتونىپ تۇرعان جوق", - دەدى ول.

ول تاجىكستان سىرتقى ساياساتتا اشىق ەكەنىن، بارلىق ەلدەرمەن، ونىڭ ىشىندە اقش جانە ەۋروپا ەلدەرىمەن دە كونسترۋكتيۆتى بايلانىس جۇرگىزە بەرەتىنىن جەتكىزدى.

اقش-تىڭ تاجىكستانداعى ەلشىسى دجون مارك پوممەرشايم 10 تامىزدا "ايماقتىق ىنتىماقتاستىق 2022" اسكەري وقۋ جاتتىعۋى اقش-تىڭ ورتالىق ازيا جانە وڭتۇستىك ازيا ەلدەرىمەن قارىم-قاتىناستى دامىتۋعا ءارى نىعايتۋعا جاقسى مۇمكىندىك" دەپ مالىمدەگەن.

Abai.kz