قاماۋداعى بەلسەندى، تىركەلمەگەن دەموكراتيالىق پارتيا جەتەكشىسى جانبولات مامايدىڭ قاماۋ مەرزىمى 12 قاراشاعا دەيىن ۇزارتىلدى. بۇل جونىندە بەلسەندىنىڭ ايەلى ينگا يمانباي فەيسبۋك پاراقشاسىندا حابارلادى.

"تەرگەۋ ورگاندارى وسى جولى قاماق مەرزىمىن سوزۋعا فورمالدى بولسا دا سەبەپ كەلتىرگەن جوق" دەپ بەلسەندىنىڭ ايەلى شەشىمدى سىنادى.

"ادۆوكاتتار جانبولاتتى قاماقتا ۇستاۋدىڭ زاڭسىزدىعىن ايعاقتايتىن ونداعان دەرەك كەلتىرگەنمەن، سۋديا ونىڭ ءبىرىن دە قاپەرىنە العان جوق" دەپ جازدى ينگا يمانباي.

الماتى قالالىق سوتىنىڭ ءباسپاسوز قىزمەتى ازاتتىققا حابارلامانى ءسال كەيىن جىبەرەتىنىن ايتتى.

تىركەلمەگەن دەموكراتيالىق پارتيا جەتەكشىسى جانبولات ماماي 26 اقپاننان بەرى اباقتىدا وتىر. ونى قاڭتار وقيعاسىندا قازا بولعانداردى ەسكە الۋعا ارنالعان ميتينگىدەن كەيىن ۇستاپ، "بەيبىت جيىن ءتارتىبىن بۇزدى" دەگەن ايىپپەن 15 تاۋلىككە قاماۋعا العان. ودان كەيىن قىلمىستىق ىستە كۇدىكتى رەتىندە تەرگەۋ يزولياتورىنا اۋىستىرعان. ونى قاماۋ مەرزىمى بۇعان دەيىن بىرنەشە رەت سوزىلعان.

ماۋسىم ايىندا جانبولات مامايعا الماتىداعى قاڭتار وقيعاسى كەزىندە "جاپپاي تارتىپسىزدىك ۇيىمداستىردى" دەگەن ايىپ تاققانى بەلگىلى بولعان.

Freedom House حالىقارالىق ۇكىمەتتىك ەمەس ۇيىمى جانبولات مامايعا قارسى "بەيبىت جيىنعا شىققانى ءۇشىن ايىپ تاعىپ وتىر" دەپ الاڭداۋشىلىق بىلدىرگەن.

Amnesty International پەن Human Rights Watch حالىقارالىق قۇقىق قورعاۋ ۇيىمدارى مەن تامىزدىڭ سوڭىندا قازاقستانعا كەلگەن ەۋروپارلامەنت دەپۋتاتتارى جانبولات ماماي مەن وزگە دە بەلسەندىلەردى قۋعىنداۋدى دەرەۋ توقتاتۋعا شاقىرعان.

قازاقستان بيلىگىن سىناپ جۇرگەن تىركەلمەگەن پارتيا وكىلدەرى بيلىكتىڭ قىسىم جاسايتىنىن ءجيى مالىمدەپ كەلەدى. بۇرىن ولاردىڭ وزدەرىن دە ءتۇرلى اكىمشىلىك جازاعا تارتقان.

Abai.kz