پرەزيدەنت قاسىم-جومارت توقاەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI سامميتىندە ازيا ەلدەرىنىڭ الەمدىك ەكونوميكاداعى ورنى تۋرالى ايتتى.

«ءححى عاسىر ازيانىڭ عاسىرى بولادى دەگەن بولجام بۇگىندە شىندىققا اينالدى. ازيا اتاۋلى ءجىو جانە ساتىپ الۋ قابىلەتىنىڭ پاريتەتى بويىنشا تانىمال الەمدىك ەكونوميكالىق كوشباسشىعا اينالدى. ايماق ايتارلىقتاي ادامي جانە تابيعي رەسۋرستارعا يە. الەمدەگى ەڭ ءىرى 30 قالانىڭ 21-ءى ازيادا ورنالاسقان. 2030 جىلعا قاراي ورتا تاپتىڭ 30 تريلليون دوللارلىق تۇتىنۋىنىڭ بارلىق بولجامدى ءوسۋىنىڭ تەك 1 تريلليون دوللارى باتىس ەكونوميكالارىنا تۇسەدى دەپ كۇتىلۋدە. الايدا، ازيانىڭ بولاشاعى ءبىزدىڭ مادەنيەتتەر، داستۇرلەر مەن دۇنيەتانىمدار اراسىنداعى ديالوگتى نىعايتۋعا ۇجىمدىق دايىندىعىمىزعا بايلانىستى»، - دەدى مەملەكەت باسشىسى.

قر پرەزيدەنتى ازياداعى ءوزارا ءىس-قيمىل جانە سەنىم شارالارى جونىندەگى كەڭەستى دامىتۋ ءۇشىن قابىلدانعان قادامدار وسى ماقساتقا سايكەس كەلەتىنىنە سەنىم ءبىلدىردى.

«كەڭەس بۇدان بىلاي ازيا قۇرلىعىندا جۇمىس ىستەيتىن باسقا دا تابىستى كوپجاقتى ۇيىمدارمەن ءوزارا ءىس-قيمىل جاساي وتىرىپ، مادەنيەتتەر مەن وركەنيەتتەر اراسىنداعى پروگرەسكە، ەكونوميكالىق وركەندەۋگە جانە ديالوگقا ىقپال ەتەتىن بولادى»، - دەدى قاسىم-جومارت توقاەۆ.

Abai.kz