بۇگىن ءماجىلىستىڭ جالپى وتىرىسىندا «رەسپۋبليكالىق جانە وبلىستىق بيۋدجەتتەر، رەسپۋبليكالىق ماڭىزى بار قالالار، استانا بيۋدجەتتەرى اراسىنداعى 2023 - 2025 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى» زاڭ جوباسى ماقۇلداندى.

اتالعان زاڭ جوباسى اكىمشىلىك-اۋماقتىق قۇرىلىمدى جانە ءۇش جاڭا وبلىستى قايتا قۇرۋ جاعدايىندا ازىرلەندى.

«تاسىلدەردىڭ ءبىرىنشى باعىتى وڭىرلەردىڭ دەربەستىگىن ودان ءارى ارتتىرۋعا باعىتتالعان. بىلتىر ۇكىمەت جەرگىلىكتى بيۋدجەتتەردىڭ كىرىستەرىن بولجاۋ ءادىسناماسىن جەتىلدىرۋ بويىنشا بىرقاتار جۇمىس اتقاردى. پارلامەنت دەپۋتاتتارى مەن ەسەپ كوميتەتىنىڭ ۇسىنىمدارى بويىنشا وڭىرلەردىڭ سالىق الەۋەتى ەسەپكە الىندى. سونىمەن قاتار، ۇكىمەت شاعىن جانە ورتا بيزنەستەن كورپوراتيۆتىك تابىس سالىعىن بەرۋدىڭ وڭ تاجىريبەسىن ەسكەرە وتىرىپ، وسى ءۇش جىلدىق كەزەڭدە دە جەرگىلىكتى بيۋدجەتتەردىڭ كىرىس بازاسىن نىعايتۋ بويىنشا تاجىريبەنى جالعاستىردى. بۇل رەتتە، زاڭ جوباسىندا بيۋدجەت سالاسى قىزمەتكەرلەرىنىڭ جالاقىسىنىڭ ورتا ەسەپپەن 25 پايىزعا وسۋىمەن، سونداي-اق جەكەلەگەن تۇسىمدەردى جەرگىلىكتى دەڭگەيگە 300 ملرد تەڭگە كولەمىندە بەرۋگە بايلانىستى قوسىمشا تۇسىمدەر ەسكەرىلدى»، - دەدى قر ۇلتتىق ەكونوميكا ءمينيسترى الىبەك قۋانتىروۆ.

ونىڭ ايتۋىنشا، بولجام بويىنشا وڭىرلەردىڭ كىرىستەرى 2022 جىلى 4,7 ترلن تەڭگەدەن 2025 جىلى 6,1 ترلن تەڭگەگە دەيىن نەمەسە 30 پايىزعا ارتىپ، 2025 جىلعا وزىندىك كىرىستەر ۇلەسىنىڭ 47 پايىزعا دەيىن ءوسۋىن قامتاماسىز ەتەدى.

سونىمەن قاتار، مينيستر مەملەكەت باسشىسىنىڭ بيۋدجەتتىك جوسپارلاۋدى جەڭىلدەتۋ جونىندەگى تاپسىرماسىن ىسكە اسىرۋ ءۇشىن بيۋدجەتارالىق ترانسفەرتتەردى قىسقارتۋ بويىنشا جۇمىس باستالعانىن ايتتى.

«بازالىق قىزمەتتەردىڭ تەڭ قول جەتىمدى بولۋىن قامتاماسىز ەتۋگە قاتىستى بيۋدجەتارالىق قاتىناستاردىڭ نەگىزگى قاعيداتىن ىسكە اسىرۋ ماقساتىندا وڭىرلەردىڭ ەرەكشەلىكتەرىن ەسەپكە الۋ بويىنشا تاسىلدەر قولدانىلدى. بۇل رەتتە وڭىرلەردىڭ الەۋمەتتىك-ەكونوميكالىق جاي-كۇيى اراسىنداعى ايىرماشىلىقتاردى دالەلدەيتىن جانە جەرگىلىكتى بيۋدجەتتەردىڭ شىعىستارىن وبەكتيۆتى ەسەپكە الۋعا مۇمكىندىك بەرەتىن سالالىق كوەففيتسيەنتتەر جاڭارتىلدى. بۇل جوسپارلى كەزەڭدە ولاردىڭ بيۋدجەتتىك قامتاماسىز ەتىلۋىن تەڭەستىرۋ ءۇشىن وڭىرلەردىڭ اعىمداعى شىعىندارىنىڭ بولجامىن ورتا ەسەپپەن 1,1 ترلن تەڭگەگە نەمەسە 23 پايىزعا ارتتىرۋعا مۇمكىندىك بەردى» - دەدى ۆەدومستۆو باسشىسى.

ءتيىستى تاسىلدەردى ەسكەرە وتىرىپ، زاڭ جوباسىندا ءۇش دونور ءوڭىر – استانا جانە الماتى قالالارى، اتىراۋ وبلىسى بەلگىلەندى. ولار بويىنشا بيۋدجەتكە الىناتىن قاراجات مىنا كولەمدەردە ايقىندالعان:

2023 جىلى – 426 ملرد تەڭگە;

2024 جىلى – 465 ملرد تەڭگە;

2025 جىلى – 498 ملرد تەڭگە.

«قالعان 17 ءوڭىر بويىنشا بيۋدجەتتىك سۋبۆەنتسيالار كولەمى 2023 جىلى 5 ترلن تەڭگە، 2024 جىلى 5,3 ترلن تەڭگە، 2025 جىلى 5,8 ترلن تەڭگە بولادى. زاڭدى ۋاقتىلى قابىلداۋ جەرگىلىكتى تۇرعىنداردى كەپىلدەندىرىلگەن مەملەكەتتىك قىزمەتتەرمەن جانە الەۋمەتتىك يگىلىكتەرمەن قامتاماسىز ەتۋگە ارنالعان جەرگىلىكتى بيۋدجەتتەردىڭ جوسپارلى كەزەڭدەگى تەڭگەرىمدىلىگىن ساقتاۋعا مۇمكىندىك بەرەدى»، - دەدى ءا.قۋانتىروۆ.

Abai.kz