ساپاسىز ينتەرنەت ءۇشىن ەلىمىزدىڭ بايلانىس وپەراتورلارى شامامەن 271 ملن تەڭگە ايىپپۇل تولەدى. بۇل تۋرالى قر تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ ءمالىم ەتتى

«ينتەرنەتتىڭ ساپاسىنا قاتىستى ءبىزدىڭ مينيسترلىك بايلانىس وپەراتورلارىنىڭ جاۋاپكەرشىلىگىن كۇشەيتۋ جۇمىسىن جۇرگىزىپ جاتىر. مەندەگى بار اقپارات بويىنشا شامامەن 271 ميلليون تەڭگە ايىپپۇل تولەندى. زاڭناماعا ءتيىستى وزگەرىستەر ەنگىزىلدى.

سونىمەن قاتار بايلانىس ساپاسىنىڭ پارامەترلەرى بەكىتىلدى. ينتەرنەت ساپاسىنا قاتىستى ماسەلە تۋىنداسا «ە-ءوتىنىش» جۇيەسى ارقىلى ءبىزدىڭ مينيسترلىكتىڭ بايلانىس كوميتەتىنە جۇگىنۋگە بولادى. سودان سوڭ ءبىزدىڭ مامان تەكسەرەدى. ەگەر ينتەرنەتتىڭ ساپاسىزدىعى راستالسا، وندا ءتيىستى ايىپپۇل سالىنادى. بۇگىنگى تاڭدا وپەراتورلارمەن وسىنداي جۇمىس جۇرگىزىلۋدە»، - دەدى اسەت تۇرىسوۆ ماجىلىستە تىلشىلەردىڭ سۇراعىنا جاۋاپ بەرە تۇرىپ.

ونىڭ ايتۋىنشا، بايلانىس وپەراتورلارىنىڭ جۇمىسىنا قاتىستى قاتاڭ شارالار قابىلداندى.

Abai.kz