- وتە ءالسىز بولىپ قالىپتى، 18 كيلوگرامعا ارىقتاپ كەتىپتى. مەنىمەن كەزدەسۋگە بالداقپەن شىقتى. بىراق العان بەتىنەن قايتپايتىنىن، اشتىعىن توقتاتپايتىنىن جەتكىزدى. ول اشتىعىنىڭ باستى ماقساتى – وپپوزيتسيانىڭ بىرىگۋى ەكەنىن ايتتى. ساياسي تۇتقىندارعا قاتىستى ماسەلە شەشىلمەسە، اشتىعىن ودان ءارى جالعاستىرماقشى. بۇل ىسىمەن قوعامدى وياتقىسى كەلەدى، - دەدى سارسەنبى كۇنى كەشكە ادۆوكات ازاتتىق تىلشىسىنە.

نۇرپەيىسوۆتىڭ سوزىنشە، ول نارىمبايعا قۇقىق قورعاۋشى باقىتجان تورەعوجينانىڭ ءوتىنىشى بويىنشا بارعان. تورەعوجينا نارىمبايدان اشتىقتى توقتاتۋىن وتىنگەن. «ءوتىنىشىن جەتكىزدىم، بىراق ەرمەك ونى ورىنداي المايتىنىن ايتتى» دەيدى ادۆوكات.

52 جاستاعى ەرمەك نارىمباي قازىر الماتى وبلىسى زارەچنىي كەنتىندەگى لا 155/14 مەكەمەسىندە جازاسىن وتەپ جاتىر. قۇقىق قورعاۋشىلار "ساياسي تۇتقىن" دەپ اتاعان نارىمباي ساياسي بەلسەندىلىگى ءۇشىن بىرنەشە رەت قىلمىستىق جازاعا كەسىلگەن. 2015 جىلى قازاندا "الاۋىزدىق تۋدىردى" دەگەن ايىپپەن ءۇش جىلعا سوتتالعان. كەيىن اپەللياتسيا سوتى ونىڭ جازاسىن جەڭىلدەتىپ، ءۇش جىلعا شارتتى جازاعا كەستى.

وسىدان كەيىن نارىمباي وزىنە بيلىك تاراپىنان قاتەر ءتونىپ تۇرعانىن ايتىپ، ۋكرايناعا كەتىپ قالدى. ول بيىل اقپان ايىنىڭ باسىندا قازاقستانعا ورالعان. بىراق الماتى اۋەجايىنان بىردەن پوليتسيا بولىمشەسىنە جەتكىزىلىپ، سوڭىنان قامالدى. ادۆوكاتتىڭ ايتۋىنشا، ونىڭ ءالى وتەلمەگەن ەكى جارىم جىل جازاسى بار.

Abai.kz