– بىزگە 5000 ادام قول وتكىزدى. بىراق ءبىز ەرىنبەي-جالىقپاي ولاردى ءوز سۇزگىمىزدەن وتكىزىپ، بۇگىن 2245 ادامنىڭ قولىن اكەلىپ تۇرمىز. ونىڭ 1250-ءى قولدارىنا قۇجاتارىن ۇستاپ ۆيدەوبايان جاسادى، - دەدى پارتيا باستاماشىل توبىنىڭ مۇشەسى اسەت ابىشەۆ.

بۇل جولى دا پارتيانى قولداۋعا قازاقستاننىڭ ءتۇرلى وڭىرنەن ەلۋدەن استام ادام جينالعان.

«العا، قازاقستان» قۇجاتىن ادىلەت مينيسترلىگى وكىلى سالتانات سماعۇلوۆا قابىلداپ الدى.

«العا، قازاقستان» تىركەلمەگەن وپپوزيتسيالىق پارتياسى بۇعان دەيىن قۇجاتتارىن 5 مامىر، 18 ءساۋىر، 22 كىركۇيەك، 12 كازاندا تاپسىرعان. ءار جولى ادىلەت مينيسترلىگى «ساياسي پارتيالار تۋرالى» زاڭنىڭ «ساياسي پارتياعا مۇشە بولۋى» تۋرالى 8-بابىنىڭ تالابى ساقتالماعانى، مۇشەلەر اراسىندا قايتىس بولعاندار بار ەكەنى تۋرالى ءبىر مازمۇندى جاۋاپ العان. مينيسترلىكتىڭ مامىرداعى جاۋابىنا باستاماشىل توپ سوتقا شاعىمدانعانىمەن، جەڭىلىپ قالعان.

ادىلەت مينيسترلىگىنىڭ مالىمەتىنشە، ەلدە 2019 جىلدان بەرى 18 ساياسي پارتيا تىركەلۋگە ءوتىنىش بەرگەن. ودان بەرى ازىرگە ءۇش باستاماشىل توپ تىركەلگەن.

بيلىك "ساياسي سەبەپپەن پارتيانى تىركەمەدى" دەگەن بەلسەندىلەر ءۋاجىن جوققا شىعارادى.

16 ناۋرىزدا پارلامەنتتە جاريالاعان جولداۋىندا قازاقستان پرەزيدەنتى قاسىم-جومارت توقاەۆ ساياسي پارتيالاردى تىركەۋ پروتسەسى جەڭىلدەيتىنىن مالىمدەگەن. پارتيالار ءۇشىن قاراستىرىلعان تىركەۋ شەگى 20 مىڭنان 5 مىڭ ادامعا دەيىن تومەندەتىلىپ، وڭىرلەردەگى وكىلدەردىڭ سانى 200 ادام بولاتىنىن ايتقان. ال پارتيا قۇرۋ ءۇشىن باستاماشىل توپتىڭ سانى دا ەڭ كەمى 1000 ادامنان 700-گە دەيىن ازايتىلادى دەگەن.

Abai.kz