«ۋكراينا ايەلدەرى سوعىستا ەرلەرمەن قاتار سوعىسىپ جاتىر. ءبىزدىڭ اسكەر قۇرامىندا قازىر 47 مىڭ ايەل بار، سوعىس باستالعان شاقتا 37 مىڭ ايەل بولعان»،- دەدى ۋكراينانىڭ ءبىرىنشى حانىمى ەلەنا زەلەنسكايا. راسىمەن دە ۋكراينا ايەلدەرى ناعىز باتىرلىقتىڭ ۇلگىسىن بۇكىل الەمگە پاش ەتتى، دەپ جازدى ELLE.UA.

ءبىزدىڭ بۇگىنگى كەيىپكەرىمىز 72-ءشى جەكە مەحانيكالاندىرىلعان بريگادا پۋلەمەتشىلەر ۆزۆودىنىڭ 19 جاسار پۋلەمەتشىسى – وكسانا رۋبانياك. ونىڭ مايداندا جۇرگەنىنە 3 اي بولعان. وكسانا ۆاسيلي ستەفانيك اتىنداعى كارپات ۇلتتىق ۋنيۆەرسيتەتى اسكەري كافەدراسىنىڭ ستۋدەنتى.

– 24 اقپاندا تاڭەرتەڭ كوزىڭىزدى اشقاندا ەڭ ءبىرىنشى نە ويلادىڭىز، نە ىستەدىڭىز؟

رەسەيدىڭ ۋكرايناعا تولىقتاي باسىپ كىرگەنىن ۇيدە ەستىدىم. مەن جالعا العان ءۇيدىڭ قوجايىنى بولمەمە جۇگىرىپ كەلىپ: «وكسانا، تۇر، سوعىس باستالدى»،- دەدى. مەن ءۇشىن سوعىس سوناي 2014 جىلى باستالعان. دوستارىم مەن تۋىستارىم شىعىسۋكراينانى قورعاۋعا اتتاندى. رەسەيدىڭ تولىقتاي باسىپ كىرۋى سونىڭ جالعاسى بولدى. بىراق ءبىز بۇل سوعىسقا ساقاداي ساي دايىن وتىردىق. تۋعان-تۋىستارىم مەن دوستارىما الاڭدادىم، ولارعا حابارلاسىپ، جۇباتتىم. سوسىن «ءوزىمنىڭ قايدا پايدام تيەدى؟» دەپ ويلادىم.

– سوعىسقا بارۋ تۋرالى شەشىمدى قالاي قابىلدادىڭىز؟

بۇل شەشىمدى قابىلداۋ مەن ءۇشىن قيىن بولمادى. مەنىڭ دوستارىم مەن كوپتەگەن تانىستارىم – اسكەريلەر، سوعىس قيمىلدارىنا قاتىسقاندار. مەنىڭ اعام العاشقىلاردىڭ ءبىرى بولىپ 2014 جىلى ۋكراينانىڭ اۋماقتىق تۇتاستىعىن قورعادى، يلوۆايسك ءۇشىن شايقاسقا قاتىسىپ، اقىرىندا تۇتقىنعا ءتۇستى. قازىر اعام مەن سياقتى شىعىس مايداندا سوعىسىپ جاتىر.

مايداندا ادامدار ءولىپ جاتقانىن بىلە تۇرا، ۇيدە تىنىش وتىرا المايمىن. مەن تۋىستارىمنىڭ، دوستارىمنىڭ، بولاشاق بالالاردىڭ ۋكراينانىڭ تۋى جەلبىرەپ، ءانى شىرقالىپ، گيمنى ويناپ تۇرعان ۋكراينا كوشەلەرىندە جۇرگەنىن قالايمىن. باسقاشا بولۋى مۇمكىن ەمەس. ءبىز باسقاشا بولۋعا جول بەرمەۋىمىز كەرەك.

– بۇل جەردەگى قىزمەتىڭىز قانداي، كۇنىڭىز قالاي وتەدى؟

مەنىڭ كۇنىم ادەتتە باسقا اسكەريلەردىكى سياقتى وتەدى. پۋلەمەتشىلەر ۆزۆودىنىڭ اسكەري قىزمەتكەرى بولعاندىقتان، ۇلكەن كاليبرلى اتىس قارۋىمەن جۇمىس ىستەيمىن. مەنىڭ پوزيتسياما باسقا ادام كەزەككە كەلگەن سوڭ، بىرنەشە كۇن دەمالىسقا شىعامىن. سول كەزدەرى ۆزۆودتىڭ ىسىنە ارالاسامىن، قاجەت بولعان جاعدايدا جارالىلاردى ەۆاكۋاتسيالايمىن نە بارلاۋعا كومەكتەسەمىن. امبەباپ ساربازبىن دەسەم بولادى، بىراق مەنىڭ نەگىزگى قىزمەتىم – پۋلەمەتشى.

– ءسىزدىڭ بولىمشەڭىزدە گەندەرلىك كەمسىتۋشىلىك بار ما؟

ۆزۆودتاعى جالعىز قىز بولساڭىز ءارى باتالونداعى ازعانتاي قىزدىڭ ءبىرى بولساڭىز، ەرلەردىڭ نازارى تۇسكەنىن سەزەسىز. بىراق مەنىڭ ويىمشا، بۇل قىزدىڭ قالاي قابىلداعانىنا بايلانىستى. مەن مۇنداعىلاردى ءوز باۋىرىمداي كورەمىن، ولار ماعان ارقاشان كومەكتەسىپ جۇرەدى.

مەن جۇمىسىم ەرلەردىڭ جۇمىسىمەن بىردەي. تاپسىرما ورىنداۋعا كەلگەندە دە گەندەرلىك ايىرماشىلىق جوق. سوعىستا ادامنىڭ جىنىسى ماڭىزدى ەمەس، باستىسى – قاجەتتى داعدىنىڭ بولۋى، ءبىلىم جانە ادامنىڭ قالاۋى.

– قانداي قيىندىقتاردى باستان كەشتىڭىز؟

تۋىستارىڭنان، اسكەردەگى جولداستارىڭنان ايىرىلۋ قاشان دا قيىن. بۇعان ەت ۇيرەتۋگە بولمايدى. ۋكراينا تاراپىنان ادام ولگەنىن، جارالانعانىن ەستىگەندە جانىڭ اۋىرادى. جۇرەگىڭنىڭ ءبىر بولىگىن كەسىپ العانداي بولادى. قاتتى جەككورۋشىلىكتەن كەك الۋعا دەگەن ۇمتىلىسىڭ كۇشەيە تۇسەدى.

– تولىققاندى سوعىس كەزىندە ءسىزدى نە تاڭعالدىردى؟

بۇكىل الەمدەگى ۋكراينداردىڭ بىرلىگى تاڭعالدىردى. ىشتەگى قونىس اۋدارۋشىلارعا، شەتەلگە قونىس اۋدارۋشىلارعا، اسكەري قىزمەتشىلەرگە كومەكتەسۋگە دەگەن شىنايى نيەتتەرى، مايدان شەبىندە كومەكتەسىپ جۇرگەن ەرىكتىلەردىڭ باتىلدىعى تاڭعالدىردى. ءبىز مۇنى قاتتى باعالايمىز.

– قازىر ءسىزدىڭ رۋحىڭىزدى تۇسىرمەي تۇرعان نە؟

اسكەر ءۇشىن ەڭ ماڭىزدىسى – تىلداعى قولداۋ. مەنىڭ بولىمشەمە عانا ەمەس، جالپى ۋكراينا قارۋلى كۇشتەرىنەن جاردەمدەسىپ جۇرگەن ەرىكتىلەرگە شەكسىز ريزامىن. سىزدەردىڭ جىلى سوزدەرىڭىز جانىمىزعا دەمەۋ بەرەدى، دۇعالارىڭىز جەلەپ-جەبەپ جۇرەدى، ال جەڭىسكە دەگەن سەنىمدەرىڭىز – ءبىزدىڭ تەز جەڭۋىمىزگە كومەكتەسەدى.

مەنىڭ اسكەردەگى جولداستارىم – مەنىڭ ەڭ ۇلكەن قولداۋشىلارىم. وسى ۋاقىت ىشىندە ولار مەنىڭ دوستارىمنان باۋىرلارىما اينالدى. ولاردى شەكسىز جاقسى كورەمىن، شەكسىز ماقتان تۇتامىن.

مەن بۇل جەردە جاي جۇرمەگەنىمدى سەزەمىن. قانشا قيىندىققا توزسەك تە، جەڭىس اياعىندا بىزدىكى بولادى. جەڭىسكە جەتۋ ءۇشىن ءبارىن جاساۋعا ءتيىسپىز.

– ۋكراينانىڭ بولاشاعىنان قانداي پەرسپەكتيۆالاردى كورەسىز؟

ۋكراينا – الىپ پروگرەسسيۆتى ەل. كوپتەگەن باعىتتا دامىپ كەلەدى: مۋزىكا، سپورت كولىك جۇيەسى، ءبىلىم بەرۋ جانە ەڭ باستىسى، اسكەري باعىتتا دامۋدا. ۋكراينا ارمياسى – الەمدەگى ەڭ كۇشتى ەكىنشى ارميا دەلىنەتىن باسقىنشىلاردىڭ اسكەرىن باسىپ وزدى. قازىر بىزدە كوپتەگەن مۇمكىندىك بار، باستىسى – ولاردى دۇرىس جانە ۋاقتىلى پايدالانۋ. ءبىزدىڭ وتانىمىز كوپ ۇزاماي دامىعان ەلدەر ساناتىنىڭ ەڭ جوعارى ساتىسىندا بولاتىنى ءسوزسىز.

– سوعىستان كەيىن ومىرىڭىزدەگى نە نارسەنى ماڭگىلىككە وزگەرتەسىز؟

قازىر مەنىڭ بويىمدا وزگەرگەن نارسە – ادامدارعا كوزقاراسىم. سوعىس بارلىق نارسەنى ءوز ورنىنا قويادى. ول ادامداردىڭ بەتپەردەسىن سىپىرىپ، ناعىز بەينەسىن، مىنەزىن، نيەتىن كورسەتەدى. باتىرلار مەن ادال نيەتتىلەر العا شىعادى، ساتقىندار مەن بوسپەلەر ارتتا قالادى. سوعىس – ۋاقىتشا دوس پەن ادال دوستىڭ ارا-جىگىن اجىراتىپ بەرەدى. كوزقاراسى مەن ماقساتى ءبىر ادامداردى توعىستىرادى.

– ۋكراينالىقتار مەن الەمگە نە ايتاسىز؟

ۋكرايندار – ەشكىمگە باعىنبايتىن ەركىن ۇلت. حالقىمىز مىڭداعان سىناقتى باسىنان وتكەردى، بىراق ولاردىڭ ەشقايسىسى ءبىزدىڭ تاۋەلسىزدىككە ۇمتىلىسىمىزدى جويا العان جوق.

ءبىز قازىر ءبىر قادام دا ارتقا شەگىنبەيمىز، جەرىمىزگە تونگەن زۇلماتتى جەڭبەيىنشە تىنبايمىز.

قۇرمەتتى ۋكرايندار، ەڭسەلەرىڭىز تۇسپەسىن! كۇشتى، ءتوزىمدى، باتىل بولىڭىزدار. ءۇمىتىڭىز وشە باستاعاندا ءبىزدىڭ باقىتتى بولاشاعىمىزدى بىزدەن باسقا ەشكىم جاساي المايتىنىن ەسكە تۇسىرىڭىزدەر.

ءبىز مىندەتتى تۇردە جەڭەمىز! ۋكراينا ەركىن، تاۋەلسىز ەل بولادى! ۋكرايناعا جاساسىن!

Abai.kz