ەلىمىزدە وتەتىن كەزەكتەن تىس قر پرەزيدەنتى سايلاۋىن 641 حالىقارالىق بايقاۋشى باقىلايدى.

«بۇگىن ساعات 18.00-دە ءبىز حالىقارالىق ۇيىمدار مەن شەت مەملەكەتتەردىڭ بايقاۋشىلارىن 20 قاراشادا وتەتىن قر پرەزيدەنتىنىڭ كەزەكتەن تىس سايلاۋىنا اككرەديتتەۋدى اياقتادىق. وسىلايشا، پرەزيدەنت سايلاۋىنا 641 حالىقارالىق بايقاۋشى قاتىسادى. ونىڭ ىشىندە 10 حالىقارالىق ۇيىمنان 532 باقىلاۋشى جانە 35 شەت مەملەكەتتەن 109 باقىلاۋشى»، - دەدى قر ورتالىق سايلاۋ كوميسسياسىنىڭ توراعاسى نۇرلان ءابدىروۆ.

ونىڭ ايتۋىنشا، حالىقارالىق باقىلاۋشىلاردىڭ قاتىسۋى سايلاۋدىڭ اشىق ءارى ءادىل وتۋىنە ىقپال ەتەدى.

«سول ارقىلى ءبىز حالىقارالىق مىندەتتەمەلەرگە بەيىلدىلىگىمىز بەن حالىقارالىق ۇيىمدارمەن جانە شەت مەملەكەتتەرمەن سايلاۋ سالاسىنداعى تىعىز ىنتىماقتاستىقتى جالعاستىراتىندىعىمىزدى راستاي تۇسەمىز»، - دەيدى ول.

وسك توراعاسى مالىمدەگەندەي، «قر سايلاۋ تۋرالى» كونستيتۋتسيالىق زاڭنىڭ نورمالارىنا سايكەس شەت مەملەكەتتەر مەن حالىقارالىق ۇيىمداردىڭ اتىنان بايقاۋشىلاردى اككرەديتتەۋ سايلاۋدان بەس كۇن بۇرىن جەرگىلىكتى ۋاقىت 18:00-دە اياقتالادى.

Abai.kz