قازاقستاندا كەدەيلىكتى ولشەۋدىڭ كوپولشەمدى مودەلىن ەنگىزىپ، اتاۋلى الەۋمەتتىك كومەكتى جەتىلدىرۋ قاجەت. بۇل تۋرالى ءماجىلىس دەپۋتاتى، الەۋمەتتىك-مادەني دامۋ كوميتەتىنىڭ توراعاسى ءجاميلا نۇرمانبەتوۆا ايتتى.

«ءبىز ءالى دە كەدەيلىكتى جەڭە الماي كەلەمىز. دۇنيەجۇزىلىك بانكتىڭ باعالاۋىنشا، قازاقستان ازاماتتارىنىڭ 15% كەدەي ساناتىندا. وعان قوسا، رەسمي ستاتيستيكا حالىقتىڭ 5,1%-ى كۇنكورىس دەڭگەيىنەن تومەن تابىسپەن ءومىر سۇرەتىنىن كورسەتەدى»، - دەدى ءجاميلا نۇرمانبەتوۆا الەۋمەتتىك كودەكس جوباسى تۋرالى ۇكىمەت ساعاتىندا.

بۇل رەتتە ەڭبەك جانە حالىقتى الەۋمەتتىك قورعاۋ مينيسترلىگى وتباسىنىڭ تسيفرلىق كارتاسىن ۇسىنىپ، ءوز جاعدايىن «قيىن» دەپ سانايتىن وتباسىلار ۇلەسى شامامەن 15% قۇرايتىنىن كورسەتكەن.

«مۇنداي قاراما-قايشى دەرەكتەر مەملەكەت قولداۋىن قاجەت ەتەتىندەردىڭ ناقتى سانىن انىقتاۋعا مۇمكىندىك بەرمەيدى. كەدەيلىك شەگىندەگى ازاماتتاردى الەۋمەتتىك قولداۋ شارالارىنىڭ ءبىرى – اتاۋلى الەۋمەتتىك كومەك. وكىنىشكە وراي، الەۋمەتتىك كودەكس جوباسىندا كورسەتىلگەن ۇسىنىس اسا وزگەرە قويماعان. سوڭعى جىلدارى كوپتەگەن ەلدەر كەدەيلىك دەڭگەيىن انىقتاۋدا كەدەيلىكتى ولشەۋدىڭ كوپولشەمدى مودەلدەرىن قولدانۋعا تىرىسۋدا، ياعني، ازاماتتاردىڭ دەنساۋلىق ساقتاۋ، ءبىلىم بەرۋ قىزمەتتەرىنە قولجەتىمدىلىگى، جەكە تۇرعىن ءۇيى جانە تۇراقتى تابىسى قارالادى. سوندىقتان مينيسترلىككە كەدەيلىكتى ولشەۋدىڭ كوپولشەمدى مودەلىن ەسكەرىپ، اتاۋلى الەۋمەتتىك كومەكتى جەتىلدىرۋدى جالعاستىرۋ قاجەت دەپ سانايمىز»، - دەدى ج. نۇرمانبەتوۆا.

سپيكەر ەڭ باستىسى – ءاربىر مۇقتاج وتباسى ءتيىستى مەملەكەتتىك ورگانداردىڭ نازارىندا بولۋى ەكەنىن ايتتى.

«ول ءۇشىن ءار وتباسىمەن جەكە جۇمىس ىستەۋ قاجەت. بۇل تسيفرلىق كارتا دەرەكتەرى بويىنشا 1,2 ملن وتباسى»، - دەدى ءماجىلىس دەپۋتاتى.

Abai.kz