اقش-تا بىلتىرعىمەن سالىستىرعاندا بيىل بەنزين باعاسى ارزانداعان. امەريكا اۆتوموبيل قاۋىمداستىعىنىڭ مالىمەتىنشە، امەريكادا گاللون بەنزينىنىڭ ورتاشا باعاسى 3,33 دوللار، ونىڭ قۇنى ءبىر جىل بۇرىن 3,34 دوللار بولعان. اقش-تا ورتاشا باعا سوڭعى اپتادا 14 تسەنتكە، سوڭعى ايدا 47 تسەنتكە تۇسكەن.

بەنزين باعاسى ماۋسىم ايىندا ءبىر گاللون ءۇشىن 5 دوللاردان ءسال اسىپ، رەكوردتىق دەڭگەيگە جەتكەن ەدى. ەنەرگيا باعاسىنىڭ تومەندەۋى اقش-تاعى تۇتىنۋشىلىق ينفلياتسيانىڭ تومەندەۋىنە ىقپال ەتىپ، ونىڭ يندەكسى قازان ايىندا قاڭتاردان باستاپ ەڭ تومەنگى جىلدىق مانگە جەتتى.

ەنەرگەتيكا سالاسىنداعى ساراپشىلار رەسەي مۇنايىن تەڭىز ارقىلى جەتكىزۋگە ەۋروپالىق ەمبارگو نارىقتا قۇبىلمالىلىق تۋدىرۋى مۇمكىن دەپ الاڭدادى. بىراق ازىرگە مۇناي باعاسى تومەندەۋدە. Brent ماركالى مۇناي فيۋچەرستەرى وسى اپتادا 10%-عا تومەندەپ، ءبىر جىلداعى ەڭ تومەنگى دەڭگەيگە جەتتى. الايدا، مۇناي قۇنىنا بىرقاتار فاكتور ىقپال ەتۋى مۇمكىن. مۇناي ەكسپورتتاۋشى ەلدەر ۇيىمى جەكسەنبىدە ءوندىرىستى 2023 جىلعا دەيىن الەمدىك سۇرانىستىڭ شامامەن 2%-نا قىسقارتۋ تۋرالى شەشىم قابىلدادى.

ەگەر وپەك ءوندىرىس كولەمىنە ودان دا قاتاڭ شەكتەۋلەر قويۋدى شەشسە، بۇل باعانىڭ قايتا وسۋىنە اكەلۋى مۇمكىن.

رەسەيدە مۇناي ءوندىرىسىنىڭ ازايۋى كۇنىنە ميلليون باررەلدەن استام جەتكىزىلىمنىڭ تومەندەۋىنە اكەلۋى مۇمكىن، بۇل دا باعانىڭ وسۋىنە ىقپال ەتەدى. سونىمەن قاتار، قىتاي تاراپىنان سۇرانىس كۇتىلگەننەن تەزىرەك قالپىنا كەلۋى مۇمكىن، ويتكەنى ەل كوروناۆيرۋس شەكتەۋلەرىن الىپ تاستاۋدا.

قحر-داعى «نولدىك Covid» ساياساتىنا بايلانىستى ەكونوميكالىق سالدارعا قاتىستى الاڭداۋشىلىق سوڭعى ايلاردا مۇناي باعاسىنىڭ تومەندەۋىنىڭ نەگىزگى سەبەبى بولدى.

Abai.kz