قازاق بالەتىنىڭ اڭىزى، قازاقستاننىڭ حالىق ءارتيسى، بالەتمەيستەر، پەداگوگ بولات ايۋحانوۆ 84 جاسىندا ومىردەن ءوتتى. قارالى حاباردى مەملەكەتتىك اكادەميالىق بي تەاترىنىڭ ءباسپاسوز قىزمەتى اقپاراتتى راستادى.

بولات عازيزۇلى ايۋحانوۆ 1938 جىلى سەمەيدە دۇنيەگە كەلدى. سوعىستان كەيىنگى جىلدارى وتباسى الماتىعا كوشىپ كەلدى دە، 1955 جىلى ايۋحانوۆ الماتى حورەوگرافيا ۋچيليششەسىن ءبىتىردى. ودان كەيىن ەكى جىل لەنينگراد حورەوگرافيا ۋچيليششەسىندە تاجىريبەدەن ءوتتى.

ول ەڭبەك جولىن 1957 جىلى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بالەت ءارتيسى بولىپ باستادى. ال 1959-1964 جىلدارى ا.ۆ. لۋناچارسكي اتىنداعى ماسكەۋ مەملەكەتتىك تەاتر ونەر ينستيتۋتىنىڭ حورەوگرافيا بولىمىندە ءبىلىم الدى.
الماتىعا قايتىپ كەلىسىمەن 26 جاسىندا الماتى حورەوگرافيا مەكتەبىن باسقارادى. اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا حورەوگراف بولىپ جۇمىس ىستەپ ءجۇرىپ، ول جەتەكشى بالەرينا ينەسسا مانسكايامەن بىرگە وزدەرى ۇيىمداستىرعان «ەكى اكتەر تەاترىندا» ونەر كورسەتتى.
بالەتمەيستەر 1965 جىلدان 2010 جىلعا دەيىن قازاقستان كومپوزيتورلارىنىڭ مۋزىكاسىنا 30-دان استام تەاتر قويىلىمىن قويعان. ونىڭ قويىلىمدارىن ەۋروپا، ازيا، سولتۇستىك امەريكا جۇرتى دا تاماشالادى.
ءارتيستىڭ «قىز جىبەك»، «گاملەت»، «كارمەن-سيۋيتا»، «شىڭعىسحان»، «بولەرو»، «قازاق سۋۆەنيرى»، «باتىرلار» جانە باسقا دا قويىلىمدارى — قازاق بالەتىنىڭ التىن قورىنا ەنگەن سپەكتاكلدەر.

بولات ايۋحانوۆ قازاق كسر مەملەكەتتىك سىيلىعىنىڭ، قازاقستاننىڭ «پلاتينالى تارلان» تاۋەلسىز وتباسىلىق كلۋبىنىڭ ماراپاتىنىڭ، «فومگەد» حالىقارالىق بي فەستيۆالىنىڭ (تۇركيا) التىن مەدالىنىڭ، سونىمەن قاتار مادەنيەت جانە ونەر سالاسىنداعى حالىقارالىق سوكرات سىيلىعىنىڭ يەگەرى.
بولات ايۋحانوۆپەن قوشتاسۋ ءراسىمى 15 جەلتوقساندا اباي اتىنداعى قازاق ۇلتتىق وپەرا جانە بالەت تەاترىندا وتەدى.

Abai.kz