بۇل جونىندە اقشولاقوۆ Atameken Business تەلەارناسىنا سويلەگەن سوزىندە ايتقان.

"ەشقانداي دا گاز وداعى تۋرالى كەلىسسوز بولعان جوق. ءبىز ەكى جاقتى اڭگىمە جۇرگىزىپ وتىرمىز، ەلىمىزدىڭ سولتۇستىك-شىعىس ايماعىن گازداندىرۋ ماسەلەسىن شەشۋ ءۇشىن رەسەيگە ءجيى بارىپ جۇرگەنىمدى بىلەسىزدەر. وزبەكستانمەن دە قارىم-قاتىناسىمىز بار، ويتكەنى ءبىز ازيا گاز قۇبىرى مەن بۇقارا - تاشكەنت - بىشكەك - الماتى گاز قۇبىرىنىڭ جۇيەسىندە بىرگە وتىرمىز. وزبەكستاننىڭ گاز ماسەلەسى بويىنشا رەسەيمەن ءوز قاتىناسى بار. كەيدە ۇشەۋلەپ وتىرىپ، تالقىلايتىن ماسەلە بولادى. بىراق ول گاز وداعىن قۇرۋ دەگەن ءسوز ەمەس", – دەدى اقشولاقوۆ.

قاراشانىڭ سوڭىندا، كەزەكتەن تىس پرەزيدەنت سايلاۋىنان كەيىن قاسىم-جومارت توقاەۆ العاشقى رەسمي ساپارمەن رەسەيگە بارعان. سول كەزدە رەسەيدىڭ قازاقستان جانە وزبەكستانمەن گاز وداعىن قۇرۋعا مۇددەلى ەكەنى ايتىلعان.

وزبەكستان ساياسي شارتتى گازعا ايىرباستامايتىنىن، رەسەيمەن گاز جونىندەگى كەلسسوز - وداقتاسۋ دەگەندى بىلدىرمەيتىنىن مالىمدەگەن.

قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو 30 قاراشادا ءۇش ەل اراسىندا گاز وداعىن قۇرۋ ماسەلەسىن تالقىلاۋعا ازىرگە ەرتە دەپ مالىمدەگەن. "قازاقستان ءوز جەرىن سانكتسيادان اينالىپ ءوتۋى ءۇشىن پايدالانۋعا جول بەرمەيدى" دەپ قوسىپ قويعان.

تاۋەلسىز رەسپۋبليكالارعا سوۆەت وداعىنىڭ گاز تاسىمال جۇيەسى مۇراعا قالعان. سونىڭ ءبىرى "ورتالىق ازيا - ورتالىق" گاز قۇبىرى تۇرىكمەنستاننان شىعىپ وزبەكستان، قازاقستان ارقىلى رەسەيگە وتەدى. قازاقستان مەن وزبەكستان قىتايعا باراتىن گاز قۇبىرىنىڭ بويىندا دا تۇر.

رەسەي گاز ەكسپورتتاۋشى اسا ءىرى ەل سانالادى. وزبەكستان مەن قازاقستان گازىن نەگىزىنەن قىتايعا ەكسپورتتايدى، الايدا ەكى ەل دە گازدى نەگىزىنەن ەلدىڭ ىشكى رىنوگىنا بولەدى.

ۋكرايناعا باسىپ كىرگەنىنە بايلانىستى ەۋروپا وداعى سانكتسيا سالىپ، رەسەي گازىنا تاۋەلدىلىگىن ازايتقان سوڭ ماسكەۋ قىتايعا ايدايتىن گاز كولەمىن ۇلعايتا تۇسكەن.

Abai.kz