«ەكىباستۇز قالاسى جاپپاي ۇسىككە ۇشىرادى» دەگەن ءسوز ارتىق ايتقاندىق دەپ ەسەپتەيدى قر پرەمەر-ءمينيسترىنىڭ ورىنباسارى رومان سكليار.

«ەكىباستۇزدا بارلىعى 689 كوپقاباتتى تۇرعىن ءۇي بار. 15 جىلىتۋ پۋنكتى اشىلدى. ارينە، تۇرعىنداردىڭ كوبى پاتەرلەرىندە بولدى. تۇرعىنداردىڭ 30 پايىزى بولاتىن شىعار، رادياتورلار اۋىستىرىلعان كەزدە مۇلىكتەرىن كۇزەتىپ، ۇيلەرىندە قالدى. بىراق بۇكىل قالا قاتىپ قالدى دەيتىندەي جاپپاي اپات بولعان جوق»، - دەدى ول.

ونىڭ مالىمەتى بويىنشا، نەگىزىنەن قالانىڭ ءۇش شاعىن اۋدانىندا تۇرعىندار جىلۋسىز قالعان.

«قاتىپ جاتقان ەكىباستۇز» دەگەن ءسوزدى ءۇش شاعىن اۋدانعا قاراتىپ ايتسا بولادى. ءيا، بۇل وتە كوپ – 5100 پاتەر، سوندا تۇرىپ جاتقان جانە 7-10 كۇن بويى جىلۋسىز قالعان 13 مىڭ تۇرعىن بار. اپات كەزىندە 149 ءۇي بىردەن جىلۋ جۇيەسىنەن اجىراتىلعان. ونىڭ ىشىندە 79 ءۇي ءبىرىنشى كۇنى-اق قايتا جالعاندى. 70 ۇيدە جۇمىس جالعاسىپ جاتتى. كەلىسەتىن شىعارسىزدار، 79 كوپقاباتتى ءۇي مەن 70 كوپقاباتتى ءۇي دەگەن ءار ءتۇرلى ساندار. تاعى دا قايتالاپ ايتام، بۇكىل قالا قاتىپ قالدى دەۋ كەم دەگەندە دۇرىس ەمەس»، - دەدى ۆيتسە-پرەمەر.

سونداي-اق، ول اپات كەزىندە ەكىباستۇزدا قالاي جۇمىس ىستەگەنىن ايتتى.

«مەن جۇزدەگەن پاتەردى ارالاپ شىقتىم. شتاب جىلۋ-ەلەكتر ورتالىعىندا ورنالاستى. مەن ءوز مىندەتىمدى قالاي كەرەك دەپ ەسەپتەسەم، سولاي اتقاردىم. ەرتە تاڭنان باستاپ ءتۇن ورتاسىنا دەيىن ءجۇردىم. جالعىز مەن ەمەس، بۇكىل شتاب جۇمىس ىستەدى. ونىڭ قۇرامىنا ەكىباستۇزداعى قالا ءتۇزۋشى ءىرى كاسىپورىنداردىڭ باسشىلارى كىردى جانە وسى جۇمىستاردى اتقاردى»، - دەدى رومان سكليار.

Abai.kz