قازاقستان 2027 جىلعا دەيىن ەسكىرگەن 3G تەحنولوگياسىنىڭ مىس كابەلدەرىن تولىقتاي جاڭارتادى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين حابارلادى.

مينيسترلىك اتالعان جىلعا دەيىن ەلدى 4G ءموبيلدى تەحنولوگياسىمەن 100% قامتۋعا، وپتيكالىق ينفراقۇرىلىممەن 90% قامتۋعا جانە قازاقستاننىڭ بارلىق اۆتوجولدارىن ينتەرنەتپەن، ءموبيلدى بايلانىسپەن تولىق قامتۋعا ۋادە بەرەدى.

"بۇگىندە ۇيالى بايلانىس جاعدايىنا قاراساق، 3G تەحنولوگياسى بويىنشا 3 مىڭنان استام ەلدى مەكەن، 4G تەحنولوگياسى بويىنشا 1628 ەلدى مەكەن قامتاماسىز ەتىلگەن، ال 5G ەلىمىزدە جوق.

مىس كابەلى ارقىلى وتەتىن بايلانىس 34%، ال وپتيكا ارقىلى 26% قۇرايدى. 3G مىس كابەل تەحنولوگياسىنىڭ الەمدە ەسكىرگەنىن ەسكەرە وتىرىپ، ولاردى 2027 جىلعا دەيىن اۋىستىرامىز. سونداي - اق 4G ءموبيلدى تەحنولوگياسىن 100% - عا، ال وپتيكالىق ينفراقۇرىلىمدى 90% - عا ارتتىرامىز", - دەپ سەندىردى مۋسين.

بۇدان باسقا، مينيستر بەس جىل ىشىندە استانا، الماتى جانە شىمكەنت قالالارىندا 5G تەحنولوگياسىنىڭ ۇلەسىن 75% – عا، ال وبلىس ورتالىقتارىندا-60% - عا ارتتىرۋعا ۋادە بەردى.

2027 جىلعا دەيىن 100% رەسپۋبليكالىق جانە وبلىستىق ماڭىزى بار اۆتوجولداردى ينتەرنەتپەن جانە ءموبيلدى بايلانىسپەن قامتۋ جوسپارلانۋدا.

Abai.kz