سەناتتىڭ جالپى وتىرىسىندا «قازاقستان ۇكiمەتi مەن تۇرىكمەنستان ۇكiمەتi اراسىنداعى ازاماتتىق قورعانىس، توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ قابىلداندى.

اتالعان كەلىسىمگە 2021 جىلعى 25 قازاندا اشحابادتا قول قويىلدى. كەلىسىمنىڭ ماقساتى - قازاقستان مەن تۇرىكمەنستاننىڭ ازاماتتىق قورعاۋ سالاسىنداعى ىنتىماقتاستىعى باعىتىندا قۇقىقتىق بازا قۇرۋ.

كەلىسىمدە ەكى ەلدىڭ ازاماتتىق قورعانىس، اپات نەمەسە وزگە دە ءزىلزالا جاعدايىندا ەرىكتى جانە ءوزارا كومەك كورسەتۋ جونىندەگى مامانداردى وقىتۋ سالاسىنداعى ءوزارا ءىس-قيمىلى ايقىندالادى.

قر توتەنشە جاعدايلار ءمينيسترى يۋري ءيليننىڭ ايتۋىنشا، ەكى ەلدىڭ بىرەۋىنىڭ اۋماعىندا توتەنشە جاعداي بولعان كەزدە، بىرلەسكەن ءىس-قيمىلدىڭ ارقاسىندا وسى كەلىسىم ەرەجەسى ىسكە اسىرىلادى.

اتالعان كەلىسىم ەلدەردىڭ قۇزىرەتتى ورگاندارى اراسىنداعى ءوزارا ءىس-قيمىلدى قامتاماسىز ەتۋگە، حالىققا قاۋىپ تونگەن كەزدە ءتيىستى ارەكەتتەرگە دايىنداۋ سالاسىندا تاجىريبە الماسۋعا، مەملەكەتتەردىڭ وقۋ ورىندارىندا ازاماتتىق قورعاۋ سالاسىندا ماماندار دايارلاۋدى جۇزەگە اسىرۋعا، اقپارات الماسۋعا، سونداي-اق توتەنشە جاعدايعا قاتىستى كومەك كورسەتۋگە مۇمكىندىك بەرەدى.

«زاڭ جوباسىنىڭ تەرىس سالدارى بولمايدى جانە قوسىمشا قارجىلاي شىعىنداردى تالاپ ەتپەيدى»، - دەدى مينيستر.

بۇدان بۇرىن حابارلانعانداي، بۇگىن سەنات توتەنشە جاعداي كەزىندە وزبەكستانمەن ارادا كومەك كورسەتۋ تۋرالى قۇجاتتى قابىلدادى.

Abai.kz