قاراعاندى وبلىسىندا اقتاۋ كەنتىندە بەس قاباتتى تۇرعىن ءۇي ورتەنىپ، سالدارىنان بەس ادام كوز جۇمدى، دەپ حابارلايدى ءوڭىردىڭ توتەنشە جاعدايلار دەپارتامەنتىنىڭ ءباسپاسوز قىزمەتى.

قايعىلى وقيعا بۇگىن تۇنگى ساعات ەكىدە بولعان. تەمىرتاۋ قالاسى ماڭىنداعى اقتاۋ كەنتىندە (جاقىن جەردەگى ءورت ءسوندىرۋ بولىمىنەن 27 شاقىرىم جەردە) 5 قاباتتى تۇرعىن ۇيدەن ءورت شىققانى تۋرالى حابار تۇسكەن.

العاشقى ءورت ءسوندىرۋ ءبولىمى وقيعا ورنىنا جارتى ساعاتتا جەتكەن. انىقتالعانداي، ءبىرىنشى قاباتتاعى 3 بولمەلى پاتەردە 40 شارشى مەتر اۋماقتا ءورت شىققان.

"توتەنشە جاعدايلار دەپارتامەنتىنىڭ بولىمشەلەرى كەلگەنگە دەيىن تۇرعىندار 5 ادامنىڭ ءمايىتىن (2007, 2010 جىلعى ۇلدار، 1983, 1991 جىلعى ايەلدەر، 1991 جىلعى ەر ادام) كىرەبەرىستەن كوشەگە الىپ شىقتى. قازا بولعاندار جوعارعى قاباتتاعى پاتەرلەردەن ءتۇتىن باسقان كىرەبەرىس ارقىلى ءوز بەتىنشە ەۆاكۋاتسيالانباق بولعان", - دەلىنگەن حابارلامادا.

باسپالداق الاڭىندا قىزىل جالىن بولماعان، الايدا ءتۇتىننىڭ كوپ مولشەردەگى كونتسەنتراتسياسى سالدارىنان تۇرعىندار دالاعا شىعىپ ۇلگەرمەگەن.

ءورت ءسوندىرۋ بولىمشەلەرى كەلگەن كەزدە بارلاۋ جانە جانىپ جاتقان پاتەردەگى ءورتتى ءسوندىرۋ بارىسىندا 6-شى مارقۇمنىڭ (1977 جىلعى ەر ادام) دەنەسى تابىلدى. ءۇش ادام اۋىرلىعى ورتاشا ءارتۇرلى دەنە جاراقاتىن العان.

سونداي-اق ءورت سوندىرۋشىلەر باسپالداق جانە تىنىس الۋ اپپاراتىنىڭ كومەگىمەن ءتۇتىن باسقان پاتەردىڭ كىرەبەرىسىنەن 10 ادامدى، سونىڭ ىشىندە 4 بالانى قۇتقاردى. ءتىلسىز جاۋ 03:10-دا وقشاۋلانىپ، 04:00-دە ءسوندىرىلدى.

ءورتتى جويۋعا قاراعاندى ​​وبلىسى توتەنشە جاعدايلار دەپارتامەنتىنىڭ 16 قىزمەتكەرى مەن 4 بىرلىك تەحنيكاسى جۇمىلدىرىلدى.

ورتكە سەبەپ بولعان جاعدايلاردى زەردەلەۋ ءۇشىن وقيعا ورنىنا توتەنشە جاعدايلار مينيسترلىگى ورتكە قارسى قىزمەت كوميتەتىنىڭ توراعاسى نۇربولات دەربىسوۆ باردى.

وقيعا ورنىندا سىناق ءورت زەرتحاناسىنىڭ ماماندارى مەن تەرگەۋشىلەر جۇمىس ىستەپ جاتىر.

ءورت فاكتىسى بويىنشا پوليتسيا قىلمىستىق كودەكستىڭ 292-بابى بويىنشا قىلمىستىق ءىس قوزعادى.

Abai.kz