ميگرانتتار ارالاساتىن Telegram-كانالدارىندا تۇراقتى تۇردە جۇمىسقا ۆاكانسيا جاريالانىپ تۇرادى. سوڭعى كەزدە رەسەي باسىپ العان ۋكراينانىڭ ماريۋپول قالاسىنا جۇمىسقا شاقىرۋ جونىندە جارناما كوبەيدى. وندا ايىنا 100 مىڭ رۋبل ايلىق ۇسىنىپ جاتىر. بۇل تۋرالى ازاتتىققا سىلتەمە جاساي وتىرىپ Abai.kz حابارلايدى.

ازاتتىقتىڭ قىرعىز قىزمەتى جارناماداعى تەلەفون نومەرلەرىنە حابارلاسقاندا، بىشكەكتە ماريۋپولعا ادامدار جىبەرەتىن ارنايى توپ بارىن انىقتادى. ولار ماريۋپولعا بارىپ جۇمىس ىستەگىسى كەلەتىندەردى قازاقستان ارقىلى شىعارىپ الادى ەكەن.

الايدا قىرعىزستاننىڭ ءىىم بۇل مالىمەتتى تەرىستەپ، تەكسەرۋ ءجۇرىپ جاتقانىن جەتكىزدى. دەرەككوزدەر مالىمەتىنشە، قازىر ماريۋپولدا ونداعان قىرعىز ازاماتى جۇمىس ىستەپ جاتىر. "مەنىڭ ءبىر تانىسىم سوندا جۇمىس ىستەپ جاتىر. كۇنىنە 5000 رۋبل، ايىنا 100 مىڭ رۋبل تولەپ جاتىر. ءبارى قۇرىلىستا، قيراپ قالعان عيماراتتاردى قالپىنا كەلتىرىپ جاتىر", - دەدى قىرعىزستاندىقتىڭ ءبىرى.

ماريۋپول قازىر كوكتەمنەن بەرى رەسەي اسكەرىنىڭ باقىلاۋىندا. وسى ۋاقىتتان بەرى 25 مىڭ ادام قايتىس بولدى، ولاردىڭ 7 مىڭى بەيبىت تۇرعىن. كرەمل قازىر وندا قالپىنا كەلتىرۋ جۇمىسى ءجۇرىپ جاتقانىن مالىمدەپ، ورتالىق ازيادان شىققان ميگرانتتار جۇمىسقا تارتىلىپ جاتقانىن جەتكىزگەن.

وسىنىڭ الدىندا وزبەكستاندىقتار مەن تاجىكستاندىقتاردى دا ماريۋپولعا جۇمىسقا تارتىپ جاتقانىنى حابارلانعان بولاتىن.

Abai.kz