دەنساۋلىق ساقتاۋ ەكس-ءمينيسترى ەلجان ءبىرتانوۆتىڭ ءىسى بويىنشا اپەللياتسيالىق شاعىمدى قاراۋ پروتسەسى 27 جەلتوقسانعا قالدىرىلدى. بۇل تۋرالى استانا قالالىق اپەللياتسيا سوتى حابارلادى.

«ءۇشىنشى سۋديانىڭ اۋرۋحانادا بولۋىنا بايلانىستى بۇگىن سوت قۇرامى تولىق ەمەس. تيىسىنشە، قازىر ءىستى قاراۋدى باستاي المايمىز. سوندىقتان ونى 27 جەلتوقسان ساعات 15:00-دەن باستاپ جۇمىس كۇنىنىڭ سوڭىنا دەيىن قارايمىز. جالعاسى 28 جەلتوقسان ساعات 10:00-15:00 ارالىعىندا بولادى»، - دەدى سۋديا ايبەك امىرعاليەۆ.

ال بۇعان قاتىستى پىكىر بىلدىرگەن ەلجان ءبىرتانوۆتىڭ ءوزى شاعىمدى قاراۋ ۋاقىتى وزگەرەتىنىن كۇتپەگەنىن ايتتى.

«ارينە، ءبىز اپەللياتسيالىق شاعىمدى قاراۋ ۋاقىتى وزگەرەدى دەپ ويلاعان جوقپىز. شىنىمدى ايتسام، مەن ءوزىمدى سوتتالعان ادام دەپ سانامايمىن. ۇكىم ايىپتاۋ اكتىسىنەن كوشىرىپ جازىلعان. ءبىر جىل ىشىندە ايتىلعان دالەلدەردى سۋديا الكەنوۆ مۇلدەم ەلەمەدى. سوندىقتان ۇكىمدى كۇتىپ، وعان دايىندالۋ ءۇشىن ءبىراز ۋاقىت قاجەت بولدى. ءبىزدىڭ ويىمىزشا، ۇكىمدە فاكتىلەر بىرجاقتى بۇرمالانعان. ءار ادۆوكاتتىڭ ءوز كوزقاراسىن ايتۋعا قۇقىعى بار. اپەللياتسيالىق سوت تىڭدايدى دەپ ۇمىتتەنەمىز«، - دەدى ەلجان ءبىرتانوۆ.

ايتا كەتەيىك، 28 قازاندا ەلجان ءبىرتانوۆتىڭ ىسىنە قاتىستى سوت ۇكىمى شىققان ەدى.

كەيىن ول بۇل شەشىممەن كەلىسپەيتىنىن ايتىپ، شاعىم تۇسىرەتىنىن مالىمدەگەن بولاتىن.

Abai.kz