جىلدىڭ الدىن الا قورىتىندىسى بويىنشا جەرگىلىكتى جولداردىڭ جاعدايى ەڭ جاقسى ايماقتار:  ماڭعىستاۋ (95%), جامبىل (95%), الماتى (91%) وبلىستارى. ەڭ ناشار وڭىرلەر باتىس قازاقستان (39%), اقتوبە (66%) جانە اتىراۋ (70%) وبلىستارى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى حابارلادى. 

يدم ءباسپاسوز قىزمەتىنىڭ مالىمەتىنشە، 2022 جىلى جول جۇمىستارىنىڭ بارلىق تۇرلەرىمەن 4,6 مىڭ شاقىرىم جەرگىلىكتى جول قامتىلدى، ونىڭ 2,6 مىڭ شاقىرىمى اياقتالدى. وعان 372 ملرد تەڭگە بولىنگەن.

جەرگىلىكتى جولدار جەلىسىن دامىتۋ شەڭبەرىندە ەلىمىزدە 486 جوبا ىسكە اسىرىلۋدا: كۇردەلى جانە ورتاشا جوندەۋ بويىنشا – 391, قۇرىلىس جانە رەكونسترۋكتسيالاۋ بويىنشا – 95 جوبا بار. جىل سوڭىنا دەيىن 164 جوندەۋ جوباسىن، اۆتوموبيل جولدارىن سالۋ جانە رەكونسترۋكتسيالاۋ بويىنشا التى جوبانى اياقتاۋ جوسپارلانعان.

"سولتۇستىك قازاقستان وبلىسىندا 160-168 كم بولاتىن "لاۆروۆكا-چكالوۆو" اۆتوموبيل جولىن جاڭارتۋ، قىزىلوردا وبلىسىندا "ايتەكە بي-باسىقارا" اۋداندىق ماڭىزى بار اۆتوموبيل جولىنداعى كوپىردى جاڭارتۋ، شىمكەنت قالاسىندا شىعىس اينالما جولىنىڭ ءبىرىنشى كەزەگىن سالۋ اياقتالۋدا",-دەپ اتاپ ءوتتى كوميتەت.

بۇدان باسقا، مەملەكەت باسشىسىنىڭ تاپسىرماسى بويىنشا ىسكە اسىرىلىپ جاتقان باكاد جوباسىنا كىرەتىن التى راديالدى جولدىڭ ءبىرى – الماتى قالاسىنداعى اباي داڭعىلىنىڭ جالعاسىن اباتتاندىرۋ جۇمىستارى اياقتالىپ كەلەدى.

جۇرگىزىلگەن جۇمىستاردىڭ قورىتىندىسى بويىنشا ەلىمىزدەگى جەرگىلىكتى جولدار جەلىسىنىڭ نورماتيۆتىك جاعدايى جىل سوڭىنا دەيىن 85%-عا جەتكىزىلەدى دەپ كوزدەلىپ وتىر.

Abai.kz