قازاقستاننىڭ اسكەري دوكتريناسى قايتا ازىرلەندى.  بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قر قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆ مالىمدەدى.

«جاڭا مەملەكەتتىك جوسپارلاۋ جۇيەسىنە سايكەس اسكەري قاۋىپسىزدىك سالاسىنداعى قۇجاتتار قايتا ازىرلەندى. مەملەكەت باسشىسىنىڭ تاپسىرماسىن ورىنداۋ ءۇشىن قازىرگى زامانعى سىن-قاتەرگە سايكەس اسكەري دوكترينا قايتا ازىرلەندى. «قاۋىپسىز ەل» ۇلتتىق جوباسى ازىرلەندى. وسى جوبا شەڭبەرىندە قارۋ-جاراقتىڭ ەلىمىزدە شىعارىلعان ۇلگىسىن دايىنداۋ، وق-ءدارى قويماسىن سالۋ، قولدانىستاعى ساقتاۋ وبەكتىسىن جەتىلدىرۋ كوزدەلگەن. جاۋىنگەرلىك دايارلىق ءىس-شاراسى اياسىندا «باتىل تويتارىس»، «ايبالتا»، «بەكەت» وقۋ-جاتتىعۋى، «التىن جەبە» كەشەندى تەكسەرىسى، سونداي-اق حالىقارالىق اسكەري ىنتىماقتاستىق شەڭبەرىندە «ەشەلون»، «ىزدەۋ»، «ءوزارا ءىس-قيمىل» وقۋ-جاتتىعۋى وتكىزىلدى. اسكەري قىزمەتشىلەر بەلارۋس، ءۇندىستان، يوردانيا، قىرعىزستان، تۇركيا، وزبەكستان جانە رەسەي ەلدەرىندە وتكەن  وقۋ-جاتتىعۋعا قاتىستى. سونىمەن قاتار، قارۋلى كۇشتەر بولىمشەلەرى جىل سايىن وتەتىن ارميالىق حالىقارالىق ويىنعا قاتىسۋدا. 34 ەلدىڭ كومانداسى اراسىندا ءبىزدىڭ كوماندا جۇلدەلى ءۇشىنشى ورىنعا يە بولدى»، - دەدى سۇلتان قامالەتدينوۆ.

سونىمەن قاتار، ەل پرەزيدەنتىنىڭ سايلاۋالدى باعدارلاماسىن ىسكە اسىرۋ جوسپارىندا وزىق قارۋمەن، باسقارۋ جۇيەسىمەن جابدىقتالعان تەحنولوگيالىق ءموبيلدى ارميا قۇرۋ، قورعانىس ونەركاسىبىن دامىتۋ، اسكەري ءبىلىم مەن عىلىمدى جەتىلدىرۋ، اسكەري قىزمەت بەدەلىن، قازاقستان ارمياسىنىڭ ابىرويىن ارتتىرۋ، جاستارعا اسكەري پاتريوتتىق تاربيە بەرۋ مىندەتى ايقىندالعان. اسكەر «قۋاتتى ارميا – جاڭا قازاقستان!» ۇرانىمەن وسى ايقىندالعان مىندەتتەردى ورىنداۋعا كىرىستى.

Abai.kz