قر پرەمەر-ءمينيسترىنىڭ ءبىرىنشى ورىنباسارى رومان سكليار 2030 جىلعا قاراي ءىرى ورمان ورتتەرىن 70% - عا قىسقارتۋعا ۋادە بەردى.

"ورمان رەسۋرستارىن دامىتۋ ماقساتىندا ەكولوگيا، گەولوگيا جانە تابيعي رەسۋرستار مينيسترلىگى مۇددەلى مەملەكەتتىك ورگاندارمەن بىرلەسىپ قازاقستان رەسپۋبليكاسىندا ورمان كلاستەرىن دامىتۋدىڭ 2030 جىلعا دەيىنگى ماسەلەلەرى بويىنشا جول كارتاسىنىڭ جوباسىن ازىرلەدى. ونىڭ شەڭبەرىندە ءىرى ورمان ورتتەرىن 2030 جىلعا قاراي 70% – عا دەيىن قىسقارتۋ كوزدەلگەن",-دەپ حابارلادى پرەمەر-ءمينيستردىڭ ورىنباسارى رومان سكليار.

سونداي-اق، سكليار جول كارتاسىنا سىلتەمە جاساي وتىرىپ، مەملەكەتتىك باسقارۋ مەن زاڭنامانى جەتىلدىرۋگە، ورمان شارۋاشىلىعى قىزمەتكەرلەرى مەن ماماندارىنىڭ جالاقىسىن كوتەرۋگە جانە ورمان مەكەمەلەرىن ماتەريالدىق-تەحنيكالىق قۇرالدارمەن قامتاماسىز ەتۋگە ۋادە بەردى.

جوباعا سايكەس، كەمىندە 500 گا القاپتا تەز وسەتىن اعاش جانە بۇتا تۇقىمدارىنىڭ جەكە ورمان پيتومنيكتەرى مەن پلانتاتسيالارى قۇرىلاتىن بولادى.

بۇل رەتتە ول 1991 جىلدان باستاپ قازىرگى ۋاقىتقا دەيىن ەرەكشە قورعالاتىن تابيعي اۋماقتاردىڭ (ەقتا) اۋماعى قولدانىستاعى ەقتا-نى كەڭەيتۋ جانە جاڭا ەقتا قۇرۋ ەسەبىنەن 869,2 مىڭ گەكتاردان 29 363,5 مىڭ گەكتارعا دەيىن ۇلعايعانىن اتاپ ءوتتى.

Abai.kz