قۇداي قالاسا، ەرتەڭ، 2023 جىلعى 5-قاڭتار كۇنى قازاق ءان ونەرىنىڭ جارىق جۇلدىزى، قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، «قۇرمەت»، «پاراسات» جانە «بارىس» وردەندەرىنىڭ يەگەرى نۇرعالي ءنۇسىپجانوۆ اعامىز 86 جاسقا تولماق. عۇمىرى ءان سۇيەر قاۋىمنىڭ الاقانىندا وتكەن مايتالمان ونەر يەسى حالىقتىڭ زور سۇيىسپەنشىلىگىنە بولەنىپ كەلەدى. وتكەن 2022 جىلى نۇرەكەڭ جاسى 85-كە كەلىپ، ساحناداعى عۇمىرىنا 65 جىل تولعاندا جوعارى جاقتان وسى مەرەيتويعا بايلانىستى ءبىر مادەني-ونەگەلىك شارالار قولعا الىنار دەپ ەدىك. نۇرعالي اعانىڭ ونەردەگى بۇكىل جولى «قازاقستاننىڭ ەڭبەك ەرى» اتانۋىنا ابدەن لايىق ەدى. وكىنىشكە قاراي ونداي قادامدار بايقالمادى.

قازاق راديوسىنىڭ التىن قورىندا نۇرەكەڭ ورىنداعان مىڭنان (1000!) استام ءان ساقتالعان ەكەن. ۇلى كومپوزيتور نۇرعيسا تىلەنديەۆكە ۇلى اقىن مۇقاعالي ماقاتاەۆتى تانىستىرىپ، سول شىعارماشىلىق دوستىقتان تۋعان قىرىققا جۋىق تاماشا اندەردى ءوزى تۇساۋىن كەسىپ، ءانشى رەتىندە حالقىنا ۇسىنعانى ءمالىم. نۇرعيسا تىلەنديەۆ نۇرعالي ءنۇسىپجانۇلىن «مەنىڭ جەكەمەنشىك ءانشىم»، –دەپ ەنشىلەگەن ەكەن. سول نۇر-اعاڭ شىعارماشىلىق ءومىرىنىڭ 30 جىلىندا جازعان اندەرىنىڭ ءبارىن «جالعىزىم-اۋ، ادالىم-اۋ»، –دەپ ءوزى ەركەلەتكەن نۇرعاليىنىڭ داۋىسىنا ارناپ جازعانىن بۇل كۇندە بىرەۋ بىلەر، بىرەۋ بىلمەس.

نۇرعالي اعا «ۆالس كورولى» اتانعان ءشامشى قالداياقوۆپەن دە ۇزاق جىلدار شىعارماشىلىق بايلانىستا جۇمىس ىستەدى. ول دا نۇرعاليدىڭ انشىلىك ونەرىنە ايىرىقشا ءتانتى بولاتىن. ديمەكەڭ (دىنمۇحاممەد قوناەۆ) تالانتتى ونەرپازدى ايىرىقشا باعالاپ، ۇنەمى قولداۋ كورسەتىپ، قامقورلىعىن ايامايتىن.

اللا عۇمىر بەرسە، نۇرعالي ءنۇسىپجانوۆ ەندى ءتورت جىلدان كەيىن توقسانعا تولار، سوندا ساحنادا 70 جىل قازاق ءان ونەرىن ناسيحاتتاعانى ءۇشىن ءسوزسىز «قازاقستاننىڭ ەڭبەك ەرى» اتانارى انىق. بىراق وسى اتاقتى شىعارماشىلىعىنىڭ 65 جىلدىعى ءۇشىن بيىل بەرسە كىمگە قانداي نۇقسان كەلمەك، قايتا بيلىكتىڭ ابىرويىنا ابىروي قوسىلماي ما؟! نۇرەكەڭ دە ەڭبەگىنىڭ لايىقتى باعالانعانىن كوزى تىرىسىندە كورىپ، رازى بولماي ما؟!

سول اتاققا بۇرىنىراق يە بولعان بيبىگۇل تولەگەنوۆا، ەركەعالي راحماديەۆ، ايمان مۇساقوجاەۆا سياقتى جۇلدىزدارمەن ەسىمى قاتار اتالسا نەسى بار؟! ولاردىڭ ءبارى ءبىر كەزەڭنىڭ، ءبىر زاماننىڭ لايىقتى تۇلعالارى. مادەنيەت مينيسترلىگى، مەملەكەتتىك حاتشى، مەملەكەت باسشىسى وسى ۇسىنىسقا مۇقيات نازار اۋدارىپ، وڭ شەشىم قابىلدانۋىنا مۇرىندىق بولسا دەيمىز!

مارات ءبايدىلداۇلى

Abai.kz