ۇلتتىق قاۋىپسىزدىك كوميتەتى ەلىمىزدىڭ ءارتۇرلى وڭىرلەرىندە ءىرى كولەمدە كوكنار شيكىزاتىن ساتۋ قىلمىسىنا قاتىسى بار ەسىرتكىمەن اينالىساتىن توپتىڭ زاڭعا قايشى ءىس-ارەكەتىن جولىن كەسۋگە باعىتتالعان ارنايى وپەراتسيانى ىسكە اسىردى، دەپ جازادى BAQ.KZ.

جەدەل زەردەلەۋ جۇمىسىنىڭ ناتيجەسىندە پەتروپاۆل قالاسىندا ەسىرتكى قىلمىسىنا قاتىستى توپتىڭ كومەكشىلەرى ۇستالىپ، 5,5 تونناعا جۋىق اتالعان اپيىن ءتۇرى الىندى.

وسى وپەراتسيانىڭ ەكىنشى كەزەڭى بارىسىندا وسكەمەن قالاسىندا 1 توننا كوكنار شيكىزاتىن الۋ ۇستىندە ەسىرتكى كۋرەرى ۇستالدى. ءدال وسى ۋاقىتتا، قاراعاندى قالاسىندا جالعا العان قويمالاردا 10 توننادان اسا ەسىرتكى شيكىزاتىن ساقتاپ كەلگەن ەسىرتكى قىلمىسىنا قاتىستى توپتىڭ ۇيىمداستىرۋشىلارى ۇستالدى.

بۇعان قوسا ءتىنتۋ شارالارى بارىسىندا ەسىرتكى قىلمىسىنا قاتىستى توپ قاتىسۋشىلارىنان جاراقاتتاۋشى جانە سۋىق قارۋ، سونىمەن قاتار ءىرى كولەمدە اقشالاي زاتتار تابىلىپ، الىندى.

الدىن الا تەرگەۋ انىقتاعانداي، اتالعان اپيىن تاماق ونىمدەرى تۇرىندە شەتەلدەن قازاقستان اۋماعىنا كىرگىزىلىپ، ەسىرتكىگە تاۋەلدى ورتادا ساۋدالانعان.

جالپى قولعا تۇسكەن ەسىرتكى كولەمى 16 توننادان استى. ودان ءارى جەدەل-تەرگەۋ امالدارى جۇرگىزىلۋدە. ەسىرتكى بيزنەسىنە قارسى كۇرەس جۇمىسى جالعاسۋدا.

Abai.kz