قوعامدىق ورىندا بالاعات ءسوز ايتقاندارعا ايىپپۇل مولشەرى كوبەيدى. بۇل تۋرالى ءىىم اكىمشىلىك پوليتسيا كوميتەتى باسقارماسى باسشىسىنىڭ ورىنباسارى ازامات قۇرىمباەۆ ايتتى.

«اكىمشىلىك قۇقىق بۇزۋشىلىق تۋرالى كودەكستىڭ جاڭا رەداكتسياسىندا قوعامدىق ورىنداردا بالاعات ءسوز ايتۋ، ادامداردى قورلاۋ مەن قۋدالاۋ، عيماراتتاردى، قۇرىلىستاردى، تۇرعىن ءۇي-جايلاردى، ورتاق پايدالانۋ ورىندارىن، كولىكتەگى جانە قوعامدىق ورىندارداعى مۇلىكتى ءبۇلدىرۋ، اينالاداعى ادامدارعا قۇرمەتسىزدىك تانىتۋ، قوعامدىق ءتارتىپتى جانە ادامداردىڭ تىنىشتىعىن بۇزاتىن باسقا دا وسىنداي ارەكەتتەر ۇساق بۇزاقىلىق بولىپ سانالادى»، - دەدى قۇرىمباەۆ ونلاين بريفينگتە.

ونىڭ سوزىنشە، بۇگىندە مۇنداي زاڭبۇزۋشىلىققا 5 اەك (17 250 تەڭگە، 1 اەك – 3 450 تەڭگە) ايىپپۇل نەمەسە 15 تاۋلىككە قاماۋعا الۋ جازاسى قاراستىرىلعان. زاڭعا ەنگىزىلگەن جاڭا وزگەرىسكە ساي، ەندى ايىپپۇل كولەمى 20 اەك (69 مىڭ تەڭگە) بولماق نەمەسە 5-30 تاۋلىككە دەيىن قاماۋعا الۋ كوزدەلگەن.

Abai.kz