كوپقاباتتى ۇيدە بولعان ءورت دەرەگى بويىنشا پوليتسيا قىزمەتكەرلەرى قىلمىستىق كودەكستىڭ 204-بابى 2-تارماعىنا (وتپەن نەمەسە قاۋىپتىلىگى جوعارى وزگەدە كوزدەرمەن جۇمىس ىستەۋ ارقىلى جاسالعان اۋىر زارداپتارعا اكەلگەن بوتەننىڭ مۇلكىن جويۋ نەمەسە ءبۇلدىرۋ) سايكەس قىلمىستىق ءىس تىركەدى.

اتالعان باپتىڭ سانكتسياسىندا 2 مىڭ ايلىق ەسەپتىك كورسەتكىش مولشەرىندە ايىپپۇل نەمەسە سول مولشەردە تۇزەۋ جۇمىستارى نەمەسە 2 جىلعا دەيىن باس بوستاندىعىنان ايىرۋ جازاسى كوزدەلگەن.

قازىرگى ۋاقىتتا ءتيىستى ساراپتامالار تاعايىندالدى. تەرگەۋ امالدارى ءجۇرىپ جاتىر.

ەسكە سالا كەتەيىك، 10 قاڭتار كۇنى ساعات 21:29-دا قاراعاندى قالاسىندا رەسپۋبليكا داڭعىلى، 18/2مەكەنجايىندا ورت شىققانى تۋرالى حابار ءتۇستى.

16 قاباتتى، ءبىر كىرەبەرىستى، 127 پاتەرلى تۇرعىن ءۇيدىڭ 8-قاباتىنداعى پاتەردە جالپى الاڭى 30 شارشى مەتر اۋماقتا ءورت شىققان.

1979 جىلى تۋعان ەر ادام جانىپ جاتقان پاتەردىڭ بالكونىنان قۇلاپ، مەديتسينالىق مەكەمەگە جاتقىزىلدى.

تەكسەرۋ بارىسىندا ءۇش ادامنىڭ دەنەسى تابىلدى (بولجام بويىنشا ەكى ەر ادام مەن ايەل).

سونداي-اق، قاراعاندى وبلىسىنىڭ تجد باسشىلىعى گاز جارىلىسى راستالماعانىن حابارلادى. وقيعا ورنىندا گاز قۇرىلعىلارى تابىلماعان.

Abai.kz