ءبىر جىلدا ينفلياتسيا 20,3%-عا جەتتى، دەپ مالىمدەدى قر ۇلتتىق بانك توراعاسى عالىمجان ءپىرماتوۆ بۇگىنگى ۇكىمەت وتىرىسىندا.

"2022 جىلدىڭ جەلتوقسان ايىندا ايلىق ينفلياتسيا 1,2%-عا دەيىن باياۋلاعانىنا قاراماستان، سوڭعى 5 جىلداعى ايلىق ورتاشا كورسەتكىش 0,7%-دان ايتارلىقتاي اسىپ ءتۇستى. جىلدىق ماندە ينفلياتسيا 20,3%-عا جەتتى. ازىق-تۇلىك باعاسىنىڭ ءوسۋى ينفلياتسياعا زور ۇلەس قوسىپ، جىلدىق كورسەتكىش بويىنشا 25,3%-عا جەتتى. جەمىس-جيدەك پەن كوكونىس ونىمدەرى قىس ماۋسىمىنا بايلانىستى قىمباتتادى", – دەدى ۇلتتىق بانك توراعاسى.

ال ازىق-تۇلىككە جاتپايتىن ينفلياتسيا 19,4%-عا دەيىن ءوستى. يمپورتتىڭ جوعارى ۇلەسى بار تاۋارلاردىڭ، ونىڭ ىشىندە جەكە پايدالاناتىن تاۋارلاردىڭ، تۇرمىستىق حيميا، قۇرىلىس ماتەريالدارى، ءدارى-دارمەكتىڭ باعاسى وسكەن.

Abai.kz