اكىمدىكتەر اۋىل تۇرعىندارىنىڭ جاعدايىن جاقسارتۋعا بولىنگەن قاراجاتتى تولىق يگەرە المادى. بۇل تۋرالى قازاقستاننىڭ ۇلتتىق ەكونوميكا ءمينيسترى الىبەك قۋانتىروۆ ايتتى.

"2022 جىلى 577 اۋىلدىق ەلدى مەكەندە ىسكە اسىرىلعان 1 مىڭنان استام جوبانى ىسكە اسىرۋعا 128 ملرد تەڭگە ءبولىندى. وبلىس اكىمدىكتەرى بيۋدجەت قاراجاتىنىڭ 94% -ىن يگەردى", - دەدى مينيستر.

وسىلايشا، 7,7 ملرد تەڭگە يگەرىلمەي قالدى. ءمينيستردىڭ مالىمەتىنشە، ۇلىتاۋ، ماڭعىستاۋ جانە باتىس قازاقستان وبلىستارىندا قاراجات تولىق يگەرىلمەگەن.

2019-2022 جىلدارى رەسپۋبليكالىق بيۋدجەتتەن 326 ملرد تەڭگە ءبولىندى. 334 تكش نىسانى، 1,2 مىڭ الەۋمەتتىك نىسان جانە 2,2 مىڭ كولىك ينفراقۇرىلىمى نىسانى سالىندى جانە جوندەلدى، 30 مىڭعا جۋىق جۇمىس ورنى قۇرىلدى.

ەستەرىڭىزگە سالا كەتەيىك، 2022 جىلدىڭ باسىندا قازاقستاندا 6293 اۋىل بارى، ونداعى حالىق سانى  7,8 ملن ادام بولدى.

Abai.kz