باتىس قازاقستان وبلىسىنىڭ اكىمى ناريمان تورەباەۆ ءبورلى اۋدانىندا نارازىلىققا شىققان جۇمىسشىلاردىڭ جالاقىنى 50 پايىز كوتەرۋ تۋرالى تالابى ورىنسىز دەپ ەسەپتەيدى.

«اقسايدا KKC-Sicim دەگەن كومپانيا بار. كومپانيا قاراشىعاناق كەن ورىندارىندا جۇمىس ىستەيتىن ەدى. بۇگىنگى كۇندە ولاردىڭ تالاپتارى - جالاقىنى 50 پايىز كوتەرۋ. ارينە، كومپانيانىڭ باسشىلارى ولارمەن كەزدەستى - كومپانيانىڭ باسشى ورىنباسارلارى كەشكە كەلىپ، تاڭەرتەڭ كەزدەستى. جۇمىسشىلاردىڭ قويىپ وتىرعان تالاپتارىن، ماسەلەلەرىن تىڭدادى. ولار 50 پايىزعا، كەي جاعدايلاردا 100 پايىزعا جالاقى كوتەرۋ ماسەلەسىن كوتەرىپ وتىر. مۇنىڭ ءبارى زاڭ اياسىندا قارالادى»، - دەدى ول ۇكىمەت كۋلۋارىندا.

ونىڭ ايتۋىنا قاراعاندا، اتالعان كومپانيادا 3 مىڭعا جۋىق ادام جۇمىس ىستەيدى.

«مەنىڭ ويىمشا، تالاپتارى ورىنسىز. سەبەبى ولاردىڭ ەكى ورتادا ۇجىمدىق كەلىسىمشارتى بار. ونىڭ سىرتىندا اربىرىمەن، جۇمىس بەرۋشى مەن جۇمىسشىنىڭ اراسىندا جەكە كەلىسىمشارتتار بار. سوندىقتان سول كەلىسىمشارتتاردا قارالعان مىندەتتەمەلەردە جالاقىنى 50 نەمەسە 100 پايىز كوتەرۋ دەگەن جوق. قىسقاشا ايتقاندا، ولاردىڭ كەلىسىمشارتىندا ايلىقتى 20 پايىز كوتەرۋ ماسەلەسى ايتىلعان. سوندىقتان مەن سول مىندەتتەمەلەرگە سۇيەنىپ ايتىپ وتىرمىن. ول جەردە ورتاشا جالاقى 280 مىڭ تەڭگەنىڭ اينالاسىندا.

ەرتەڭ كەشكە كومپانيانىڭ ەڭ ۇلكەن باسشىسى يتاليادان كەلەدى. سول كەلگەن سوڭ جۇمىسشىلارمەن تاعى كەزدەسەدى. زاڭ تالاپتارى بويىنشا ولار جۇمىسقا شىعۋى كەرەك. ولار جۇمىسقا قازىر بارعان جوق. سەبەبى وزدەرىنىڭ كەلىسىمشارتتارىندا قارالماعان جالاقىنى سۇراپ وتىر. سوندىقتان بۇل جەردە زاڭعا سايكەس شارالار قابىلدانادى. ول جەردە 3 مىڭعا جۋىق ادام جۇمىس ىستەيدى»، - دەدى وبلىس اكىمى.

ەسكە سالايىق، كەشە باتىس قازاقستان وبلىسىندا 500 قىزمەتكەر جۇمىسقا شىعۋدان باس تارتقانىن، كەيىن بۇل ماسەلەگە قاتىستى ءوڭىر اكىمدىگى تۇسىنىك بەرگەن بولاتىن.

Abai.kz