ءماجىلىس سايلاۋىنا رەسپۋبليكالىق بيۋدجەتتەن قارجى ءالى قاراستىرىلماعان. بۇل تۋرالى قارجى ءمينيسترى ەرۇلان جاماۋباەۆ مالىمدەدى، دەپ جازدى Ulysmedia.kz.

«سەنات دەپۋتاتتارىنىڭ سايلاۋىن وتكىزۋگە رەسپۋبليكالىق بيۋدجەتتەن قاراجات بولىنگەن جوق. ال الداعى ءماجىلىس  پەن ءماسليحات سايلاۋلارىن وتكىزۋگە قولدانىستاعى بيۋدجەتتە رەسپۋبليكالىق بيۋدجەتتەن ازىرگە قاراجات قاراستىرىلماعان. ەگەر قاجەتتىلىك بولسا، بيۋدجەتتى ناقتىلاۋ كەزىندە  قاراستىرامىز»، - دەدى مينيستر.

جاماۋباەۆتىڭ سوزىنشە، رەسپۋبليكالىق بيۋدجەت  ناۋرىز ايىندا قايتا ناقتىلانباق.

«ناۋرىز ايىندا بيۋدجەتتىڭ ناقتىلانۋىن كۇتىپ وتىرمىز.  بۇعان دەيىن الدىنداعى سايلاۋلاردىڭ شىعىندارىمەن جوبالاپ ايتقان ەدىك. بىراق رەسپۋبليكالىق بيۋدجەتتە سايلاۋعا بيىل قاراجات جوق. سايلاۋدى ءبارى ءبىر وتكىزۋ كەرەك بولسا، قاراجات بولەمىز. ەگەر ناقتىلاۋ كەزىندە ۇلگەرمەسەك، ورتالىق سايلاۋ كوميسسياسىنىڭ تاراپىنان ءوتىنىم بەرىلەدى. ءبىز ۇكىمەت رەزەرۆىنەن قاراستىرامىز»،  –  دەدى ۇكىمەت باسشىسىنىڭ ورىنباسارى.

بۇدان بۇرىن ماجىلىستىڭ ءار دەپۋتاتىن سايلاۋعا 426 ملن تەڭگە جۇمسالاتىنى ايتىلعان بولاتىن.

Abai.kz