شىعىس قازاقستان وبلىسى ريددەر قالاسىنداعى جىلۋ ەلەكتر ورتالىعىنان ءورت شىقتى.

الەۋمەتتىك جەلىدە ريددەر قالاسىنداعى جىلۋ ەلەكتر ورتالىعى ورتەنىپ جاتقاندىعى تۋرالى ۆيدەو تارادى.

شقو اكىمدىگىنىڭ مالىمەتىنشە، قازىرگى ۋاقىتتا ريددەر قالاسىندا جىلۋ ەلەكتر ورتالىعىنداعى ءورت ءوشىرىلدى.

«19 قاڭتاردا ساعات 06:54-تە «ريددەر جەو» اق وتىنمەن قامتاماسىز ەتۋ تسەحىندا ءورت شىققان. ءدال وسى ساتتە ءتىلسىز جاۋ اۋىزدىقتالدى. ورتتەن زارداپ شەككەن ەشكىم جوق. جانارمايمەن قامتاماسىز ەتۋدى قالپىنا كەلتىرۋ جۇمىستارى باستالدى»، - دەلىنگەن اقپاراتتا.

ەسكە سالا كەتەيىك، وتكەن جىلدىڭ سوڭىندا ريددەردەگى جىلۋ قازاندىعىنان اقاۋ شىعىپ، قالادا توتەنشە جاعداي جاريالاندى.

سونداي-اق بيىلعى 4 قاڭتاردا ريددەر جىلۋ ەلەكتر ورتالىعىنداعى ستانسادا تاعى دا اپات بولدى.

Abai.kz