تۇركياداعى پرەزيدەنت سايلاۋى 2023 جىلدىڭ 14 مامىرىندا وتەدى. بۇل تۋرالى ەل پرەزيدەنتى رەجەپ تايىپ ەردوعان ايتتى.

بۇعان دەيىن سايلاۋ وسى جىلدىڭ ماۋسىم ايىنا جوسپارلانعان بولاتىن. بىراق جازدىڭ العاشقى ايىندا كوپتەگەن جۇمىسشىلار مەن ستۋدەنتتەر دەمالىسقا شىعادى، 100 مىڭنان استام تۇركيا ازاماتى قاجىلىققا اتتانباق. سوندىقتان سايلاۋ مەرزىمى وزگەرتىلگەن.

تۇرىك ەلىندەگى كەزەكتى پرەزيدەنت سايلاۋى بۇرىن-سوڭدى بولماعان جۇمىسسىزدىق، ينفلياتسيا، قىمباتشىلىق كەزەڭىنە تاپ كەلىپ تۇر.

تۇركيا ستاتيستيكا ينستيتۋتىنىڭ مالىمەتى بويىنشا: 2022 جىلدىڭ قىركۇيەك ايىنىڭ سوڭىندا ەلدەگى جىلدىق ينفلياتسيا 83,45 پايىزعا جەتكەن. بۇل 1998 جىلدىڭ قىركۇيەگىنەن باستاپ ەسەپتەگەندە ەلدەگى جىلدىق ينفلياتسيانىڭ ەڭ جوعارى دەڭگەيى.

ەسەپتە ازىق-تۇلىك پەن الكوگولسىز سۋسىندار باعاسىنىڭ جىلدىق ءوسۋى 93 پايىزدى قۇراعانى اتاپ وتىلگەن. تاسىمالداۋ سالاسىنداعى باعانىڭ ءوسۋى – 117,66 پايىزدى قۇراعان. وتكەن جىلى كوممۋنيكاتسيا جانە ءبىلىم بەرۋ سالالارىنداعى باعالار  30,76 پايىزعا جانە 36,69 پايىزعا ارتقان.

Abai.kz