"2022 جىلعى تامىزدا ء"شولدالا" شەكارا زاستاۆاسىندا مەرزىمدى قىزمەتىن وتكەرگەن ۇقك شەكارا قىزمەتى ساربازىنىڭ قازا بولۋىنا بايلانىستى باق-تىڭ كوپتەگەن ساۋالىنا بۇل جاعدايدىڭ قر قارۋلى كۇشتەرىنە قاتىسى جوق ەكەنىن حابارلايمىز", - دەلىنگەن مالىمدەمەدە.

وسى ورايدا مينيسترلىك ماماندارى اسكەرگە شاقىرىلعان ەل ازاماتتارى قارۋلى كۇشتەردىڭ بولىمشەلەرىندە عانا ەمەس، ۇلتتىق ۇلاننىڭ ء(ىىم), شەكارا قىزمەتى (ۇقك), توتەنشە جاعدايلار مينيسترلىگى مەن مەملەكەتتىك كۇزەت قىزمەتىندە بورىشىن وتەيتىنىن دە ەسكە سالدى.

ايتا كەتەرى، قىركۇيەك ايىندا ساربازدىڭ ولىمىنە قاتىسى بار دەگەن كۇدىكپەن ءبولىم كومانديرى قاماۋعا الىندى. ال ونىڭ ادۆوكاتى سەرجان پىراليەۆ سوت-مەديتسينالىق ساراپتاما ناتيجەسىنە سايكەس مارقۇمنىڭ دەنەسىندە ەكى نەمەسە ودان دا كوپ ادامنىڭ دنق-سى تابىلعانىن، بىراق ءوزى قورعاپ جاتقان كۇدىكتىنىڭ دنق-سى بولماعانىن مالىمدەدى.

ىشكى ىستەر مينيسترلىگى ادۆوكاتتى قىزمەتتىك ەتيكا نورمالارىن بۇزعانى ءۇشىن ايىپتادى. ەندى ادىلەت مينيسترلىگى قىزمەتتىك تەرگەۋ جۇرگىزەدى.

Abai.kz