پرەزيدەنت قاسىم-جومارت توقاەۆ الەۋمەتتىك نىسان، ساياباق جانە ويىن الاڭىنىڭ ورنىنا ءزاۋلىم كەڭسەلەر سالۋعا رۇقسات بەرىپ جاتقان لاۋازىم يەلەرى جەمقورلىققا بايلانىستى جاۋاپقا تارتىلاتىنىن ءمالىم ەتتى.

«تاعى ءبىر ماسەلە بار. قالانىڭ كەلبەتىن بۇزىپ تۇرعان الا-قۇلا جارنامالار وتە كوپ. ونىڭ ءبارى تالاپقا ساي بولۋى كەرەك.

سونداي-اق قالادا ورىنسىز قۇرىلىس جۇمىستارى كوبەيىپ كەتتى، ياعني ۇيلەردىڭ اراسىنا عيمارات سالىنا بەرەتىن بولدى. بۇل اسىرەسە، «مىڭجىلدىق» اللەياسىندا، سارايشىق، سىعاناق، تۇران، بەيسەكوۆ كوشەلەرىندە قاتتى بايقالادى.
تۇرعىندارعا الەۋمەتتىك نىسان، ساياباق نەمەسە ويىن الاڭى سالىنادى دەپ ۋادە بەرىلەدى. الايدا، ول جەردە ءيىن تىرەسكەن عيماراتتار پايدا بولادى. مىسالى، «وليمپ پالاس-2» تۇرعىن ءۇيىنىڭ اۋلاسىنداعى ويىن الاڭىنىڭ ورنىنا ءزاۋلىم كەڭسە سالىنعان.
مۇنداي قۇرىلىستى ءبىرجولا دوعارۋ كەرەك. ايتپەسە، شەشىم قابىلداعان ءتيىستى لاۋازىم يەلەرى جەمقورلىققا بايلانىستى جاۋاپقا تارتىلادى. سەبەبى وسىنداي شەشىمدەردىڭ استارىندا قۇرىلىس كومپانيالارىنىڭ اكىمدىكتە جۇمىس ىستەيتىن ادامدارمەن بىرگە ازاماتتارىمىزدىڭ ىقىلاسىنا قارسى قابىلداعان ارەكەتتەرى جاتىر»، - دەدى ق.توقاەۆ.

Abai.kz