الماتىدا 100-دەن استام ادامدى الداعان "كاۋسار ترەۆەل" كومپانياسىنىڭ باسشىسى ۇستالدى. ول ءاربىر ادامنان كەم دەگەندە مىڭ دوللاردان العان. سايرام اۋدانىنىڭ تۇرعىنى جارقىن بەكمىرزاەۆقا ۋمرانىڭ سەرتيفيكاتىن كەلىنشەگى توسىنسىي رەتىندە تۋعان كۇنىنە سىيلاعان. تالاي جىلعى ارمانى بولعان كيەلى ساپارعا ەرلى-زايىپتى قاڭتاردا ۇشۋى كەرەك ەدى. الايدا ءتۇرلى سىلتاۋ ايتقان "كاۋسار ترەۆەل" تۋرفيرماسى باس-اياعى 57 ادامدى ءۇش كۇن كەشىكتىرىپ، مەدينا قالاسىنا جەتكىزىپتى. بىراق قوناۇيگە بارا سالا، تۋرفيرما وكىلدەرى ورىن دايىندايمىز دەپ، سول كۇيى ءىزىم-عايىم جوعالعان.

"تاڭەرتەڭ جەتىدە ەكسكۋرسيا بولادى، دايىندالىڭىزدار دەدى دە، "كاۋسار ترەۆەل" وكىلى كەتىپ قالدى. سودان ءبىز تاڭەرتەڭ تۇرساق، "كاۋسار ترەۆەل" وكىلدەرى دە جوق، اۆتوبۋس تا جوق، تاماعى دا دايىن ەمەس، اقشاسى دا تولەنبەگەن", - دەيدى بەكمىرزاەۆ.

بەيتانىس قالادا ءتىل بىلمەيتىن 57 ادامنىڭ جاعدايىن سول جاقتا جۇرگەن قازاقتار ەستىگەن. سودان باسقا تۋرفيرما وكىلدەرى كومەككە كەلگەن. ولار مەدينادان ەكى-ءۇش كۇنگە قوناقۇي جالداپ، ارى قاراي مەككەگە ساپارىن ۇيىمداستىرىپ بەرگەن. ءتىپتى، قاسيەتتى قاعبا ماڭىنان بەس كۇنگە جاتىن ورىن جالداپ بەرىپتى. ال ەلگە ورالاتىن ۋاقىت تاياعاندا تۋرفيرما باسشىسى مەدەت مۇراتبايۇلى قايتار بيلەت دايىنداپ جاتىرمىن دەپ، تاعى دا حابار-وشارسىز كەتكەن.

"دەمەۋشىلەردىڭ اقشاسىن ەسەپتەمەگەننىڭ وزىندە ميلليوننان اسا شىعىنعا باتتىق. دەمەۋشىلەردىڭ كوپ كومەگى بولدى. قوناق ءۇي جالداپ، تاماق الىپ بەردى. قوناق ءۇيدىڭ ءبىر كۇنى 180 دوللار ەكەن", - دەپ اتاپ ءوتتى جارقىن بەكمىرزاەۆ.

ونىڭ ايتۋىنشا، مەككەدە "كاۋسار ترەۆەل" الداپ كەتتى دەگەن 70 شاقتى ادام جۇرگەن. قازىر الماتى مەن شىمكەنتتەن قاسيەتتى ساپارعا شىعا الماي وتىرعاندار كوپ ەكەن. ولار دا پوليتسياعا دا ارىز جازعان. وسىدان كەيىن ءتارتىپ ساقشىلارى "كاۋسار ترەۆەلدىڭ" باسشىسىنا ىزدەۋ سالىپ، مەدەت مۇراتبايۇلى الماتىداعى جالدامالى پاتەرلەردىڭ بىرىندە ۇستالدى.

"مەككە مەن مەدينا قالالارىنا جولداما الىپ، 50-گە جۋىق ادامدى الداعان تۋريستىك اگەنتتىكتىڭ باسشىسى ۇستالدى. اتالعان ءجايت بويىنشا قر قك 190-بابىمەن قىلمىستىق ءىس قوزعالىپ، كۇدىكتى قاماۋعا الىندى", - دەيدى پوليتسەيلەر.

تۋرفيرماعا الدانعانداردىڭ ناقتى سانىن پوليتسەيلەردىڭ ءوزى ايتا الماي وتىر. سەبەبى بۇعان دەيىن ۇشا الماعانداردان بولەك، الداعى اقپان ايىنا اقشا بەرىپ قويعان ازاماتتار دا بار.

Abai.kz