Amanat پارتياسى جانىنداعى مەملەكەتتىك باسقارۋدى دامىتۋ جانە سىبايلاس جەمقورلىققا قارسى كۇرەس جونىندەگى رەسپۋبليكالىق قوعامدىق كەڭەستىڭ توراعاسى ەرلان سايروۆ بولات نازارباەۆتىڭ زاڭسىز العان دەپ تانىلعان جەرلەرىن قايتارۋعا قاتىستى ءىستىڭ ءمان-جايىن ايتتى. بۇل تۋرالى Tengrinews.kz جازدى.

پارتيانىڭ سايتىندا سايروۆقا سىلتەمە جاساپ، قازىر بولات نازارباەۆتىڭ ەنشىلەس كومپانيالارىنا تيەسىلى ماڭعىستاۋ وبلىسىندا 239 مىڭ گەكتار، جامبىل وبلىسىندا 60 مىڭ گەكتار جەر مەملەكەت مەنشىگىنە قايتارىلعانىن حابارلادى. بۇعان دەيىن باس پروكۋراتۋرامەن بىرلەسىپ، اۋماعى 244 گەكتار 59 جەر ۋچاسكەسى انىقتالدى، ولاردىڭ مەنشىك يەسى كۇماندى جاعدايلاردا بولات نازارباەۆ بولدى.

مالىمەتتەردى راستاۋ ءۇشىن Tengrinews.kz تىلشىسى سايروۆقا حابارلاستى.

ول Amanat پارتياسى جانىنداعى سىبايلاس جەمقورلىققا قارسى كەڭەس قوعامدىق قۇرىلىم ەكەنىن ءتۇسىندىردى. ەگەر ولارعا دابىل تۇسسە، مەملەكەتتىك ورگانداردىڭ كەيبىر ناقتى ارەكەتتەرىنىڭ زاڭدى نەمەسە زاڭسىزدىعىن انىقتاۋ ءۇشىن باس پروكۋراتۋراعا جىبەرىلەدى.

"بىزگە الماتى وبلىسىنداعى ءبىر توپ ادامنان زاڭسىز ارەكەتتەر تۋرالى ارىز ءتۇستى. باس پروكۋراتۋراعا الماتى، تالعار، استانا، قاسكەلەڭ جانە تۇركىستان وبلىسىنداعى 244 گەكتار جەر بويىنشا ساۋال جولدادىق. قازىر باس پروكۋراتۋرا وكىلدەرى بۇل جەرلەردىڭ كوپشىلىگى زاڭسىز بەرىلگەنىن انىقتادى. باس پروكۋراتۋرا بۇل جەرلەردى مەملەكەتكە قايتارۋ ءۇشىن ءىس-قيمىل جۇرگىزىپ جاتىر", - دەپ ءتۇسىندىردى ەرلان سايروۆ.

ول جەرلەردى مەملەكەت مەنشىگىنە قايتارۋ تۋرالى دابىل تۇسكەن ساتتەن باستاپ التى اي وتكەنىن، شاعىم 2022 جىلعى قىركۇيەكتە تۇسكەنىن ايتتى.

ەسكە سالايىق، مەملەكەت باسشىسى قاسىم-جومارت توقاەۆ 2022 جىلعى 1 قىركۇيەكتەگى حالىققا جولداۋىندا يگەرىلمەي جاتقان نەمەسە زاڭسىز بەرىلگەن جەرلەرگە قاتىستى شارالار قابىلداۋدى تاپسىرعان بولاتىن.

"يگەرىلمەي جاتقان نەمەسە زاڭسىز بەرىلگەن جەرلەردىڭ كولەمى - شامامەن 10 ميلليون گەكتار. ۇكىمەت پەن اكىمدىكتەر كەلەسى جىلدىڭ اياعىنا دەيىن بۇل جەرلەرگە قاتىستى ناقتى شەشىمدەر قابىلداۋى كەرەك", - دەدى مەملەكەت باسشىسى.

Abai.kz