يراننىڭ رۋحاني كوشباسشىسى اياتوللا الي حامەنەي قاماۋداعى "ون مىڭداعان" ادامعا، ونىڭ ىشىندە جاقىندا ۇكىمەتكە قارسى ءىرى اكتسيالاردا قامالعان ازاماتتارعا راقىمشىلىق بەردى. بۇل تۋرالى جەكسەنبى كۇنى ەلدىڭ مەملەكەتتىك باسىلىمدارى جازدى.

اقپاراتقا قاراعاندا، راقىمشىلىق 1979 جىلداعى يسلام رەۆوليۋتسياسىنىڭ 44 جىلدىعىنا وراي جاريالانعان.

"بۇل راقىمشىلىقپەن "شەتەلدىك قۇرىلىمداردىڭ پايداسىنا تىڭشىلىق جاساۋ", "شەتەلدىك اگەنتتەرمەن بايلانىستا بولۋ", "ادەيىلەپ ادام ءولتىرۋ جانە جاراقات كەلتىرۋ", "مەملەكەتتىك مۇلىككە زيان كەلتىرۋ" ايىپتارى تاعىلماعان ازاماتتار بوستاندىققا شىعادى" دەلىنگەن.

يراندا ۇكىمەتكە قارسى نارازىلىق اكتسيالار 2022 جىلى قىركۇيەكتە، ورامالدى دۇرىس تاقپاعانى ءۇشىن قاماۋعا الىنىپ، پوليتسيا بولىمىندە قازا تاپقان 22 جاستاعى ستۋدەنت قىز ماحسا ءامينيدىڭ ولىمىنەن كەيىن باستالدى.

ۇكىمەت بۇگىنگى كۇنگە دەيىن جالعاسىپ جاتقان اكتسيالاردى شەتەلدىك كۇشتەر قولداپ جاتقان "بۇلىك" دەپ ايتىپ كەلەدى.

قۇقىق قورعاۋ ۇيىمدارىنىڭ مالىمەتىنە قاراعاندا، نارازىلىق باستالعاننان بەرى يراندا 500-دەن استام ادام قايتىس بولىپ، 20 مىڭعا جۋىعى قاماۋعا الىنعان. قازا بولعانداردىڭ اراسىندا جاسى كامەلەتكە تولماعان 70 بالا بار. بۇدان بولەك اكتسيالارعا قاتىسقانى ءۇشىن بىرنەشە ادامدى دارعا استى.

Abai.kz