ەلىمىز قىلمىس دەڭگەيى بويىنشا الەم ەلدەرىنىڭ رەيتينگىندە 48-ءشى ورىنعا يە بولدى. جارتى جىل بۇرىن بۇل كورسەتكىش بويىنشا مەملەكەتىمىز 47-ءشى ورىندا تۇرعان، دەپ جازادى Ulysmedia.kz.

ەلدەگى قىلمىس يندەكسى 52,7 بولدى – ول نەعۇرلىم جوعارى بولسا، قىلمىس جاعدايى سوعۇرلىم ناشار بولادى.

يندەكس ساۋالنامالار نەگىزىندە مەملەكەتتەگى قىلمىستىڭ جالپى دەڭگەيىن كورسەتەدى. قىلمىس دەڭگەيى 40-تان 60-قا دەيى بولسا، رەيتينگ جاساۋشىلار "ورتاشا" دەپ باعالايدى. تمد ەلدەرىنىڭ اراسىندا قازاقستانعا قاراعاندا بەلارۋس پەن قىرعىزستاندا قىلمىس دەڭگەيى جوعارى، ال مولدوۆا، ۋكراينا، رەسەي جانە وزبەكستاندا بۇل كورسەتكىش الدەقايدا تومەن.

رەيتينگ اۆتورلارى قىلمىس تۇرعىسىنان ەڭ قاۋىپتى ەلدەر رەتىندە ءالى كۇنگە دەيىن ۆەنەسۋەلا مەن پاپۋا – جاڭا گۆينەيانى قاراستىرادى، ال كاتار “الەمدەگى ەڭ قاۋىپسىز مەملەكەت” اتاعىن ساقتاپ قالدى.

2022 جىلدىڭ قورىتىندىسى بويىنشا قازاقستاندا 157,5 مىڭ قىلمىستىق قۇقىق بۇزۋشىلىق تىركەلدى. بۇل وتكەن جىلمەن سالىستىرعاندا 0,3%-عا از. وتكەن جىلى الماتىدا ەڭ كوپ قىلمىس تىركەلدى – 34,9 مىڭ، بۇل كورسەتكىش ءبىر جىلدا 25,9%-عا ءوستى. قىلمىس كوپ جاسالاتىن وڭىرلەر مەن قالالاردىڭ توپ ۇشتىگىنە استانا (17,1 مىڭ قۇقىق بۇزۋشىلىق) جانە الماتى وبلىسى (12,6 مىڭ قۇقىق بۇزۋشىلىق) كىردى. قىلمىستار كوبىنەسە جاڭادان قۇرىلعان اباي، جەتىسۋ جانە ۇلىتاۋ وبلىستارىندا تىركەلدى. جالپى ەل بويىنشا 10 مىڭ ادامعا شاققانداعى قۇقىق بۇزۋشىلىق دەڭگەيى 2021 جىلعى 82,7 -دەن 2022 جىلى 79,9-عا دەيىن تومەندەدى، - دەلىنگەن ستاتيستيكادا.

قىلمىس تۇرلەرىنە كەلەتىن بولساق، 2022 جىلى ەلدە مۇلىككە قارسى قىلمىستار ءجيى تىركەلگەن(122,2 مىڭ، بۇل 2021 جىلمەن سالىستىرعاندا 2,1% - عا كوپ). باسقا كەڭ تارالعان قىلمىستاردىڭ قاتارىندا حالىقتىڭ دەنساۋلىعى مەن ادامگەرشىلىككە قارسى قىلمىستىق قۇقىق بۇزۋشىلىقتار جانە جەكە ادامعا قارسى قىلمىستىق قۇقىق بۇزۋشىلىقتار بار.

Abai.kz